Հայի բնավորություն է, որ հարևանի արած աշխատանքը մեզ ավելի ակտիվ է թվում. Գագիկ Բեգլարյան

Այսօր ԱԺ նիստում, ուր քննարկվում էր 2016թ. բյուջեի նախագիծը, տրանսպորտի և կապի նախարար Գագիկ Բեգլարյանը զեկուցեց, որ բյուջեի նախագծով նախատեսվում է իրականացնել 22 ծրագիր, որոնցից 10-ը վարկային ծրագրեր են:

ՀՀԿ-ական Խոսրով Հարությունյանը հարցրեց, թե Հյուսիս-հարավ ճանապարհաշինարարական նախագծով քանի՞ կիլոմետր է նախատեսված կառուցել 2016-ին: Պատգամավորը հետաքրքրվեց նաև չինական նախագիծ համարվող Մետաքսի նոր ճանապարհով:

Գագիկ Բեգլարյանը պատասխանեց, որ նախարարությունը վերանորոգում է կենսական նշանակություն ունեցող ճանապարհները, որովհետև կան միջհամայնքային ու միջպետական ճանապարհներ, որոնք շատ ավելի վատ վիճակում են:

Ինչ վերաբերում է Մետաքսի ճանապարհին, նախարարը պատասխանեց. «Այդ ուղղությամբ Հայաստանը պակաս ակտիվ չի աշխատում, ուղղակի մեր բնավորությունն է այդպես, որ մեզ մեր հարևանների արած աշխատանքը ավել ակտիվ է թվում: Իրան-Հայաստան-Վրաստան համագործակցությունն ակտիվ ընթանում է, այդ հարցով մեկնելու եմ Իրան, լինելու եմ Բուլղարիայում, հանդիպելու եմ մեր վրացի գործընկերների հետ»: