Հանրաքվեին նույնականացման քարտերով քվեարկության կարգավորման մեխանիզմը դեռևս անորոշ է

Այսօր խորհրդարանում պետական-իրավական հարցերի մշտական հանձնաժողովի լսումների ընթացքում հարակից զեկուցմամբ հանդես եկավ ԱԺ պատգամավոր Տիգրան Ուրիխանյանը և ներկայացրեց «Նույնականացման քարտերի մասին» Հայաստանի Հանրապետության օրենքում փոփոխություն կատարելու մասին օրինագծի հետ կապված իր հիմնավորումները:

Ուրիխանյանին հարց ուղղեց ՀՅԴ–ական պատգամավոր Արծվիկ Մինասյանը. «Ինչպե՞ս եք պատկերացնում` կրկնակի քվեարկության մեխանիզմն ինչպե՞ս է կարգավորվելու, և առաջարկին համարժեք ի՞նչ լուծումներ կան, արդյոք: Ինչպես նաև` հանրաքվեին մասնակցելու համար ի՞նչ լուծումներ եք առաջարկում»:

Ուրիխանյանը պատասխանեց, որ ցանկացած տարբերակ, որը վերաբերում է վերահսկողություն սահմանելուն, իր կողմից ընդունելի է: «Էլեկտրոնային լուծումները գուցե պահանջում են լուրջ ծախսեր, սակայն փողի մասին խոսակցություններն արդյո՞ք տեղին են, երբ խոսվում է ընտրությունների պատվի մասին»,- ասաց նա:

Արծվիկ Մինասյանն արձագանքեց, որ խոսքը ոչ թե փողի մեծության մասին է, այլ համակարգի կազմակերպման: