Եթե Victoria՛s Secret-ի «հրեշտակի» զգեստն արժե 3500 դոլար, ապա իմ տարազն արժե 6000 դոլար. Լուսիկ Ագուլեցի

Տեղեկացրել էինք, որ նորաձևության բնագավառի հեղինակավոր Vogue ամսագրի ռուսական տարբերակի խմբագրությունը հանրահայտ Victoria\'s Secret ընկերության «հրեշտակ» Ստելա Մաքսվելի հետ որոշել է յուրահատուկ ֆոտոսեսիա կազմակերպել Հայաստանի տարածքում: Լուսանկարներից մեկն արվել է նկարչուհի Լուսիկ Ագուլեցու տանը։

Yerkir.am-ի հետ զրույցում նկարչուհին ասաց, որ իրեն զանգահարել էր մի աղջիկ և ասել, որ Նյու Յորքից հյուրեր ունեն, որոնք ցանկանում են իրեն հյուընկալվել: «Լուսանկարիչը ամերիկահայ Դևիդ Մուշեգենն էր: Ինձ միայն ասացին, որ նա, ով պետք է նկարի, ամերիկահայ է: Խնդրեցին` եթե հնարավոր է` տարազ հագնեմ: Ես սիրով հագա, ու անցանք գործի` նկարվելուն: Տղան, որ հայ էր, շատ էր ազդվել, մի տեսակ հուզված էր: Աղջկան չէի էլ ճանաչում, հետո իմացա, որ հայտնի դեմք է: Աղջիկն ինչ-որ զգեստ էր հագել, որը պետք է նաև գովազդեր  /Ջիվենշի` Ռիկարդո Թիսչիի/: Զգեստը շատ թանկ արժեր: Ես նրանց հարցրի գինը, ասացին, որ այն 3500 դոլար արժե: Ես էլ ասացի` դե, որ այդպես է, իմն արժե 6000 դոլար: Ի դեպ, նրանք համաձայն էին, որովհետև մոտիկից տեսան` ձեռագործ աշխատանքն ինչ մանրակրկիտ ձևով է արվել»,- ասաց Լուսիկ Ագուլեցին:

Նա նշեց նաև, թե կարծել է` միայն հնի և նորի տարբերությունն են ուզում ցույց տալ: «Շատ ուրախ եմ, որ հենց մեր տարազն է նման ֆիրմային զգեստի կողքին ներկայացվում. հագել էի Վասպուրականի շրջանի տարազ, բայց ժամանակակից ձևով ներկայացված»,- ասաց նկարչուհին:

Ըստ նրա` հյուրերին իր թանգարանում գտնվող իրերն են նաև հետաքրքել: Նրանց հատկապես դուր են եկել տիկնիկները: «Նրանք իմ թանգարանային նկարները նայեցին, երկու հատ գիրք գնեցին: Գնեցին իմ «Անցյալի մասունքները», որն իմ թանգարային հավաքածուն է ներկայացնում: Գիրքը մի քանի գլխից է բաղկացած` 250 գոտիների օրինակներ են, հետո` տարազների… Իսկ մյուս գիրքը հայոց տոնածեսերի մասին էին, այսպես ասած` հայոց տոնածեսերն` ըստ Լուսիկ Ագուլեցու: Նրանք ուղղակի տարվել էին իմ տարազներով, մի խոսքով` հիացած եմ ճանապարհել մեր տնից»,- ասաց տիկին Ագուլեցին: