«Մահապատիժը գործում է». հացադուլավոր ցմահ դատապարտյալների ծնողները բողոքի ակցիա են անում (լուսանկարներ)

Այսօր առավոտից կառավարության շենքի առջեւ բողոքի ակցիա են իրականացնում հացադուլ հայտարարած` ցմահ ազատազրկման դատապարտվածների հարազատները: Նրանք պարզել են «Մահապատիժը գործում է», «Գործերի վերանայում», «Արդարություն» և այլ գրությամբ պաստառներ և պահանջում են վերանայել քրեական գործերը:

Yerkir.am-ի հետ զրույցում ցմահ դատապարտված Արթուր Մկրտչյանի մայրը՝ Ջահավիր Մկրտչյանը, հայտնեց, որ նախկին զինդատախազ Գագիկ Ջհանգիրյանը հարցազրույցներից մեկի ժամանակ ուշագրավ հայտարարություն է արել, որը վերաբերում է իր որդու գործին: Դա էլ հաշվի առնելով` իրենք դիմել են, որպեսզի նոր երևան եկած հանգամանքների հիման վրա գործը վերանայվի:

Ցմահ դատապարտված Արեն Չատինյանի մայրն էլ հայտնեց, որ ցմահ դատապարտվածներից շատերն անմեղ են, սակայն, քանի որ տեր չեն ունեցել, հանցագործությունները բարդել են նրանց վրա: «Իրենց արած կեղտերը փակելու համար սաղ բարդել են էն մարդկանց վրա, ովքեր անտեր են, փող չունեն»,- հայտարարեց նա:

Մանրամասները ՝ yerkir.am-ի տեսանյութում: