Մինչեւ տարեվերջ Հայաստանի եւ Ադբեջանի նախագահները կհանդիպեն. ՄԽ

Մինսկի խմբի համանախագահներ Իգոր Պոպովը (Ռուսաստան), Ջեյմս Ուորլիքը (ԱՄՆ), Պիեր Անդրիուին (Ֆրանսիա), ԵԱՀԿ գործող նախագահի անձնական ներկայացուցիչ դեսպան Անջեյ Կասպրշիկը Նյու Յորքում սեպտեմբերի 24-ին ՀՀ ԱԳ նախարար Էդվարդ Նալբանդյանի և սեպտեմբերի 25-ին Ադրբեջանի ԱԳ նախարար Էլմար Մամեդյարովի հետ առանձին-առանձին և նախարարների հետ միացյալ հանդիպումներից հետո հայտարարույուն են տարածել, որում նշվում է, որ  Հայաստանի և Ադրբեջանի արտաքին գործերի նախարարները համաձայնել են ԵԱՀԿ Մինսկի խմբի համանախագահների հետ շարունակել նախագահական հաջորդ հանդիպման նախապատրաստական աշխատանքները: Երկու երկրների նախագահների հանդիպումն ակնկալվում է մինչև տարեվերջ, հայտնում է «Արմենպրես»-ը:

Համանախագահների հետ արտգործնախարարների հանդիպումներն անցկացվել են միջազգային սահմանին և շփման գծում լարվածության թուլացման անհետաձգելի միջոցների ձեռնարկման անհրաժեշտությամբ` նպատակ ունենալով շարունակել  տևական լուծման հասնելու բանակցությունները, իրականացնել վստահության կառուցման միջոցառումներ:

«Համանախագահները կոչ են արել Հայաստանի և Ադրբեջանի նախագահներին ընդունել հրադադարի խախտումների հետաքննության` ԵԱՀԿ առաջարկած մեխանիզմը: Առանց այդպիսի մեխանիզմի կողմերը կշարունակեն միմյանց մեղադրել շփման գծում և Հայաստան-Ադրբեջան սահմանին մահացու հարվածներ հասցնելու մեջ: Հայաստանը համաձայնել է քննարկել մեխանիզմի մանրամասները. մենք կոչ են անում Ադրբեջանին անել նույնը»- նշված է հայտարարության մեջ: 

Համանախագահները խիստ տոնով դատապարտել են հրետանու կիրառումը, որը վերջին օրերին լուրջ վնասներ ու կորուստներ է պատճառել` ցավակցություն հայտնելով զոհվածների հարազատներին: Բռնությունների ուժգնացումը հայերի ու ադրբեջանցիների, նաև բանակցությունների շահերից չի բխում: 

Համանախագահները խրախուսել են կողմերին իրականացնել մարդ-մարդ շփումներին նպաստող ծրագրեր և կառուցել վստահություն հասարակությունների միջև: