Դեմիրթաշը մտափոխվե՞լ է Ցեղասպանության հարցում, թե՞...

Թուրքիայում ընդդիմադիր քրդամետ Ժողովուրդների դեմոկրատական կուսակցության նախագահ Սելահաթթին Դեմիրթաշը CNN Turk-ի եթերում հերքել է Հայոց ցեղասպանության վերաբերյալ իր խոսքերը. տեղեկացնում է Haberler-ը:

Ըստ Habeler-ի՝ մինչ այդ CNN Turk-ում Հաքան Չելիքի ծրագրին հյուրընկալված Դեմիրթաշը Հայոց ցեղասպանության մասին ասել էր, որ իրենց կուսակցությունն «անվարան ճանաչում է Հայոց ցեղասպանությունը, քանի որ այն ցեղասպանություն է եղել»:

Նա հայտնել էր, թե այն պատճառով, որ օսմանյան ժառանգությանը ամենաշատը տեր է կանգնում իշխող «Արդարություն և զարգացում» կուսակցությունը, ուրեմն հայերից ներողություն խնդրողը հենց նա էլ պետք է լինի:

Haberler-ի հաղորդմամբ` այդ խոսքերից հետո բազում քննադատությունների առաջ կանգնած Դեմիրթաշն այս անգամ CNN Turk-ի եթերում չի օգտագործել «ցեղասպանություն» բառը: Լրագրող Լևենթ Գյուլթեքինի՝ Ցեղասպանության վերաբերյալ հարցին Դեմիրթաշը պատասխանել է, որ իրենք նման բան չեն ասել, այլ կուսակցության ծրագրի շրջանակներում ճշմարտությունների բացահայտման համար հանձնաժողով ստեղծելու ցանկություն է հայտնել: