Շունը հաչում է, քարավանը՝ քայլում. Դեմիրթաշը՝ էրդողանամետ թերթի լպիրշ հրապարակմանն ի պատասխան

Երեկ ներկայիս Թուրքիայի տարածքում գտնվող հայկական Տիգրանակերտ (Դիարբեքիր) քաղաքի Սիլվան շրջան այցելության ժամանակ թուրք ոստիկանները հարձակվել և արցունքաբեր գազ էին կիրառել քրդամետ Ժողովուրդների դեմոկրատական կուսակցության կին համանախագահ Ֆիգեն  Յուքսեքդաղի և այլ պատգամավորների վրա: 

Էրդողանապետ Yeni Akit թերթը, անդրադառնալով կատարվածին, լպիրշ հրապարակում էր արել կին պատգամավորի լուսանկարի վերաբերյալ, թե «նրա հարդարված մազերը խառնվել են»:

Ի պատասխան՝ քրդամետ կուսակցության նախագահ Սելահաթթին Դեմիրթաշն ասել է. «Մարդկային մահերը կանխելու նպատակով Սիլվան մեկնած կին պատգամավորի հետ կատարված ստորության մակարդակն ահա սա է: Սակայն շունը հաչում է, քարավանը՝ քայլում»:

Հիշեցնենք, որ այսօր 11-րդ օրն է, որ Սիլվանում արգելված է փողոց դուրս գալ: Թուրք ոստիկանների և քուրդ զինյալների միջև բախումներ են տեղի ունենում: Երեկ հրապարակված տվյալների համաձայն՝ 10 օրվա ընթացքում բախումների հետևանքով մահացել է 7 մարդ: