Google-ում երբեք այդքան շատ չի փնտրվել Հայոց ցեղասպանության մասին տեղեկություն, որքան վերջին երկու շաբաթների ընթացքում

Տեղեկատվական անվտանգության հարցերի փորձագետ Սամվել Մարտիրոսյանն այսօր լրագրողների հետ զրույցում համոզմունք հայտնեց, որ աշխարհի կողմից Հայոց ցեղասպանության փաստի ընկալման հարցում իրավիճակն այս տարի տարբերվում է բոլոր նախորդ տարիներից:

Մեդիափորձագետի բնորոշմամբ՝ Ցեղասպանության նկատմամբ հետաքրքրությունն աննախադեպ մեծացել է: «Google որոնողական համակարգում երբեք այդքան շատ չի փնտրվել Հայոց ցեղասպանության մասին տեղեկությունը, որքան վերջին երկու շաբաթների ընթացքում: Եթե խնդիրը բաժանենք բովանդակային և տեխնիկական մասերի, պետք է նկատել, որ տեխնիկական մասով վտանգ կա` ապրիլի 23-ի և 24-ի հետ կապված: Կարելի է սպասել բոլոր տեսակի կայքերի վրա զանգավածային հարձակումների, սակայն խնդիրն ավելի վտանգավոր է դառնում, երբ հարձակումն արդեն ուղղվում է Հայոց ցեղասպանության մասին կարևոր ինֆորմացիա պարունակող և լրատվական կայքերի վրա: Երբ ամբողջ աշխարհում այդ օրերին անընդհատ շրջանառվում է Հայոց ցեղասպանության մասին տեղեկությունը, նրանք միանգամից տեղեկությունը փորձում են ստանալ հայկական կայքերից: Երբ հայկական կայքերն անհասանելի են լինում, նրանք գնում են դեպի թուրքական լրատվամիջոցներ»,- նշեց Սամվել Մարտիրոսյանը:

Նրա համոզմամբ` վերջին տարիներին ադրբեջանական հաքերային խմբերն ավելի շատ են ներգրավվել տեղեկատվական պատերազմների մեջ, քան թուրք հաքերները: «Թուրք հաքերների թվում լուրջ հաքերներ վերջերս չեն երևում ասպարեզում, և կարելի է ենթադրել, որ շատ հայկական կայքեր արդեն կոտրվել են, բայց դրա մասին դեռևս գիտեն նրանք, ովքեր դա արել են: Այդ մասին մենք հավանաբար ապրիլի 24-ին հենց կիմանանք: Հարձակումները կարող են նաև լինել կապի օպերատորների մակարդակով, ինչի հետևանքով կարող է կապի խաթարում լինել մի քանի ժամով»,- նշեց Մարտիրոսյանը:

Խոսելով խնդրի բովանդակային կողմի մասին` նա ասաց, որ մենք այս պարագայում ավելի շատ շահեկան դիրքում ենք գտնվում, քանի որ Google-ում երբեք այդքան շատ չի փնտրվել Հայոց ցեղասպանության մասին տեղեկություն, որքան վերջին երկու շաբաթների ընթացքում:

Ինչ վերաբերում է անվտանգության միջոցառումներին, Սամվել Մարտիրոսյանը նշեց, որ բոլոր այն մասնագետները, ովքեր պատասխանատու են կայքերի անվտանգության պահպանման համար, պետք է մի քանի անգամ ուշադիր լինեն և ավելի ուժեղացնեն իրենց աշխատանքը: