Պետք է մեկնենք Բաքու և ցույց տանք, որ ոչ ոքից չենք վախենում. Խորեն Հովհաննիսյան

Այսօր լրագրողների հետ հանդիպեց հայկական ֆուտբոլի լեգենդ Խորեն Հովհաննիսյանը:

 -ԽՍՀՄ-Աշխարհի հավաքական խաղից մեկ օր անց Հայաստանի ազգային հավաքականը հանդիպում ունի Ալբանիայի հետ: Ինչպե՞ս եք գնահատում Հայաստանի հավաքականի շանսերն այդ խաղում:

 - Ալբանիայում կարողացանք ոչ-ոքի խաղալ 1996-97 թվականներին, իսկ Երևանում հաղթեցինք 3:0 հաշվով: Իմ կարծիքով` մեր հավաքականը պատրաստ է այս խաղին: Տղաներն ամեն ինչ կանեն, որ անպայման հաղթենք, քանի որ հնարավորություն կտրվի շարունակելու պայքարը ԵՎՐՈ 2016-ի ուղեգրի համար:

-Վարդան Մինասյանի օրոք մեր հավաքականն ավելի տպավորիչ ֆուտբոլ էր ցուցադրում: Ի՞նչն է պակասում այժմ:

-Նոր մարզչին պետք է ժամանակ տալ: Շատ բան է կախված նաև ֆուտբոլիստներից, որ տվյալ պահին լինեն լավ մարզավիճակում: Պետք է հաշվի առնենք նաև, որ մի քանի հանդիպում մեր հավաքականն անցկացրել է ոչ հիմնական կազմով:

Խորեն Հովհաննիսյանն անդրադարձավ նաև Բաքվի Եվրոպական խաղերին հայ մարզիկների մասնակցությանը. «Իմ կարծիքով` մենք անպայման պետք է մասնակցենք և գնանք այնտեղ միայն հաղթանակի համար: Պետք է ցույց տանք, որ մենք ոչ մեկից չենք վախենում: Եթե ես լինեի, միանշանակ կմասնակցեի»: