«Արարատ»-ում մի շարք փոփոխություններ են տեղի ունեցել

Հունվարի 12-ին «Արարատը» վերսկսեց մարզումները, որոնք կշարունակվեն Հայաստանում մինչև հունվարի 17-ը: Տարվա առաջին մարզումը թիմն անցկացրեց «Միկա» մարզահամալիրի արհեստական խոտածածկով խաղադաշտում:

Նախապատրաստական փուլում նախատեսված են երկու արտասահմանյան հավաքներ, որոնցից առաջինը կկայանա հունվարի 18-ից 31-ը Սոչիում, որի ընթացքում թիմը երկու ստուգողական հանդիպում կանցկացնի:

Երևանյան ակումբի մամուլի ծառայությունը տեղեկացնում է, որ, մի շարք նորեկներից զատ, «Արարատ»-ին միացել են ևս մի քանի արտասահմանցի ֆուտբոլիստներ:

Թիմի կազմում փորձաշրջան են անցնում երկու կենտրոնական պաշտպաններ: 22-ամյա Նագուի Բոուրասը նախկինում հանդես է եկել ֆրանսիական «Կանի» երկրորդ թիմում և Բելգիայի «Շաերբիկում», իսկ 20-ամյա կոտդիվուարցի Սուլեյմանե Կոնեն խաղացել է տեղի «ԱՍԵԿ Միմոզաս» թիմում, ինչպես նաև Սոֆիայի ԲԿՄԱ-ում:

«Արարատ»-ին միացել են նաև 3 իրանցի ֆուտբոլիստներ: 26-ամյա ձախ պաշտպան Սեյեդ Հոսեյն Հոսեյնին հանդես է եկել «Մես», «Սայփա» և «Փեյքան» թիմերում, իսկ 27-ամյա կիսապաշտպան Ամիրի Շոեիբը` «Սայփայում» և «Պերսեպոլիս Շոմալում»: 25-ամյա հենակետային կիսապաշտպան Սաման Աղազամանին խաղացել է «Պերսեպոլիսում» և «Ռահ Ահանում», ներկայացրել է Իրանի Մ-17, Մ-21 և Մ-23 հավաքականները:

Ավելացնենք, որ երկկողմանի համաձայնությամբ խզվել են պայմանագրերը սերբ ֆուտբոլիստներ Նիկոլա Պրեբիրաչևիչի և Չեդոմիր Տոմչիչի  հետ: