ԱԺ-ում հանդարտ է, ստեղծվել է համերաշխության մթնոլորտ

Կառավարության ներկայացրած օրինագիծը սահմանամերձ համայնքներին արտոնություններ շնորհելու մասին, որն այսօր քննարկվում էր արտահերթ նիստում, հազվադեպ համերաշխության մթնոլորտ էր ստեղծել թե' ընդդիմության ու քաղաքական մեծամասնության, թե' ընդդիմության ու կառավարության միջև: Այլընտրանքային ԲՀԿ-ն և ընդդիմադիր բոլոր խմբակցությունները կարևորեցին կառավարության ներկացրած այդ օրինագիծը: Ընդդիմադիրները ներկայացնում էին առաջարկներ, իսկ ՀՀ տարածքային կառավարման նախարարի ժամանակավոր պաշտոնակատար Վաչե Տերտերյանը խոստացավ հաշվի առնել բոլոր առաջարկությունները, քննարկել դրանք և բարելավել օրենքը:

ՀՀԿ խմբակցության ղեկավար Վահրամ Բաղդասարյանը գոհունակ ժպիտով նշեց, որ հազվագյուտ դեպքերից է, երբ «խորհրդարանում կրքերը հանդարտ են»:

«Մեր գործընկերներն ունեն որոշ անհանգստություններ` այս օրենքի հետ կապված: Այդ մտահոգությունները բոլորս ունենք, բայց դրանք ժամանակի մեջ կլուծվեն, սա վերջը չէ, սահմանամերձ համայնքների հարցը պարբերաբար պետք է լինի թե' կառավարության ուշադրության կենտրոնում, թե'  ԱԺ քննարկման կենտրոնում»,- ասաց նա:

Նշենք, որ, կառավարության որոշմամբ, նախատեսվում է արտոնությունները սահմանել երեք տարի ժամկետով: ՀՅԴ խմբակցության ղեկավար Արմեն Ռուստամյանն առաջարկեց այդ ժամկետը հանել: Իսկ ՀՀԿ խմբակցության ղեկավարը, դիմելով Վաչե Տերտերյանին, ասաց. «Ժամկետների հարցը, պարո'ն Տերտերյան, պետք է վերանայել»:

ԱԺ փոխխոսնակ Էդուարդ Շարմազանովն իր ելույթում նույնպես ընդգծեց ընդդիմության և կառավարության միջև համերաշխությունը և համաձայնությունը` ասելով. «Սա դասական երկխոսության օրինակ է, երբ քաղաքական ուժերը միասնական հայտարարի են գալիս հասարակության համար ամենակարևոր հարցերի շուրջ: Մենք ունենք համագործակցության մեծ փորձ և հեռանկար, և անհրաժեշտության դեպքում ընդդիմությունը կարողանում է համախմբվել իշխանությունների հետ»:

Վաչե Տերտերյանն իր խոսքում նշեց, որ պատգամավորները շատ արժեքավոր դիտողություններ են արել և շնորհակալություն հայտնեց այդ դիտողությունների ու առաջարկությունների համար: «Հնչեցին շատ արժեքավոր դիտողություններ ու առաջարկներ, որոնք մանրամասն կքննարկվեն: Երեք տարվա ժամկետի հետ կապված` ասեմ՝ եթե ժամկետ չդրվի, կնշանակի, որ միշտ այդպես է լինելու: Չնայած կարելի է ժամկետ չդնել և ինչ-որ պահի նորից խնդրին անդրադառնալ»,- ասաց նա: