«Շատերն իրենց չեն կարող թույլ տալ լինել նախկին նախարար ու կնոջը դեկրետ ուղարկելուց տասնյակ միլիոնավոր դրամների գումար դուրս գրել»

ԱԺ-ում 2015թ. բյուջեի քննարկման ժամանակ ԱԺ ԲՀԿ խմբակցության քարտուղար Նաիրա Զոհրաբյանը հարց ուղղեց ՀՀ աշխատանքի եւ սոցիալական հարցերի նախարար Արտեմ Ասատրյանին հղիներին տրվող գումարի չափի վերաբերյալ:

«Նախորդ կառավարության ժամանակ ԲՀԿ-ն առաջարկ էր ներկայացրել` հղիներին տրվող գումարի հետ կապված, որպեսզի այդ նպաստը տրվի նաև չաշխատող մայրերին: Այդ ժամանակ մեր նախաձեռնությունը որակվեց պոպուլիզմ: Ես ուրախ եմ, որ այս կառավարության գնահատականները պոպուլիզմի վերաբերյալ փոփոխվել են: Ես պաշտպանում եմ բոլոր այն կանանց, որ դուրս են եկել՝ իրենց իրավունքները պաշտպանելու, բայց պետք է լինենք անկեղծ ու հասկանանք, որ այստեղ նաև լրջագույն խնդիր կա»,- ասաց պատգամավորը:

Նա բերեց ֆինանսների նախկին նախարար Դավիթ Սարգսյանի կնոջ օրինակը, որին այսօր անդրադարձել էր մամուլը: Նշենք, որ, ըստ այդ հրապարակման, ՀՀ ֆինանսական հաշտարար Փիրուզ Սարգսյանը ծննդաբերությունից անմիջապես հետո վերադարձել է աշխատանքի եւ, որպես հղիության եւ ծննդաբերության նպաստ, ստացել 20 մլն դրամ:

«Շատերն իրենց չեն կարող թույլ տալ լինել ֆինանսների նախկին նախարար ու իրենց կանանց դեկրետ ուղարկելուց տասնյակ միլիոնավոր դրամների գումար դուրս գրել: Շատերն իրենց չեն կարող թույլ տալ լինել արտոնյալ ու գործարքների մեջ մտնել գործատուների հետ՝ վերջին մեկ տարում բարձր աշխատավարձի գնալու ու անտրամաբանական հոնորար ստանալու համար»,-նշեց Նաիրա Զոհրաբյանը:

Աշխատանքի և սոցիալական հարցերի նախարար Արտեմ Ասատրյանը պատասխանեց, որ չաշխատող մայրերի հղիության և ծննդաբերության նպաստի կապակցությամբ որևէ փոփոխություն չի եղել մոտեցումներում, խնդիրը մի քանի տարի շարունակ քննարկվել է, և բոլոր քաղաքական ուժերն այդ ուղղությամբ իրենց մտահոգությունը միշտ հայտնել են:

«Վերջին տարիներին ներկայացրած նախաձեռնությունների վերաբերյալ մեր կառավարության դիրքորոշումը եղել է այն, որ դա ենթադրում է լրացուցիչ շուրջ 15-16 միլիարդ դրամ տարեկան, որ մինչև երկու տարեկան խնամող բոլոր մայրերին տրամադրվեն այդ նպաստները, և հիմնական խնդիրը դա է եղել, քանի որ հնարավորություն չի եղել»,- ասաց նախարարը: