Ինչո՞ւ է Հանրային հեռուստաընկերության վերցրած վարկը փակել կառավարությունը

Այսօր ԱԺ նիստում շարունակվեցին Հանրային հեռուստաընկերության 2013թ. գործունեության վերաբերյալ քննարկումները:

ԱԺ «Ժառանգություն» խմբակցության պատգամավոր Թևան Պողոսյանը կարծիք հայտնեց, որ Հանրային հեռուստաընկերության եթերում բովանդակային բարելավում կա, բայց ամբողջական լսարանը դեռևս միջին կարողությունների տեր մարդկանց համար է հարմարեցված, մինչդեռ Հանրայինը պետք է բոլորի համար լինի: Թևան Պողոսյանը առանձնացրեց, օրինակ, գիտական պոտենցիալ ունեցող լսարանին` ասելով, որ այդ լսարանի համար հաղորդումներ գրեթե չկան:

«Հասկանալի է, որ Հանրայինը նաև վարկանիշին է հետևում ու փորձում է մրցակցել այլ հեռուստաընկերությունների հետ, բայց այն պետք է հանրային լինի` բառի բուն իմաստով, և չպետք է ուշադրություն դարձնի միայն վարկանիշին»,- ասաց Թևան Պողոսյանը:

ԱԺ ՀՀԿ խմբակցության պատգամավոր Խոսրով Հարությունյանը նշեց, որ ինքն անձամբ ընդգծված դրական գնահատական ունի Հանրային ռադիոյի նկատմամբ և կրկնեց Թևան Պողոսյանի արտահայտած կարծիքը, որ Հանրային հեռուստաընկերությունը պետք է լինի ոչ թե կոմերցիոն, այլ պահանջված: Խոսրով Հարությունյանի համոզմամբ` Հանրային հեռուստաընկերության առաքելությունը պետք է լինի կրթել Հայաստանի քաղաքացուն, հայրենասեր քաղաքացուն, գիտության կրթության նկատմամբ սեր ունեցող և քաղաքացիական դիրքորոշում ունեցող քաղաքացուն:

«Փորձեք պրոպագանդել ոչ թե հայտնի ինչ-որ մեկին, այլ հասարակ քաղաքացուն, ասենք` աշխատասեր գյուղացուն, փորձեք մեծարել ուսուցչին: Հանրայինը պետք է կերտի կերպարներ, որոնք օրինակելի կլինեն, բայց այդ ամենը պետք է արվի հյութեղ, պրոֆեսիոնալ ձևով»,- ասաց պատգամավորը:

ԱԺ ԲՀԿ խմբակցության պատգամավոր Միքայել Մելքումյանը որոշ վերապահումներ ուներ` լրատվական լուսաբանման, մասնավորապես` քաղաքական դաշտն անաչառ և օբյեկտիվ լուսաբանելու հետ կապված: «Դուք գիտե՞ք Հանրայինի գեթ մեկ հեռուստամեկնաբանի, ով ժողովրդականություն է վայելում, կամ ժողովուրդը նրանց անկեղծությանն է հավատում»,- հռետորական հարց ուղղեց նա:

ԱԺ ՀՅԴ խմբակցության պատգամավոր Արծվիկ Մինասյանը ընդհանուր առմամբ դրական գնահատեց Հանրայինում փոփոխությունները` ակնկալելով ավելի անաչառ հաղորդումներ: Նա նաև բարձրացրեց Հանրայինի արդյունավետ կառավարման հարցը: Ըստ պատգամավորի` Հանրայինի խորհրդի ներկայացուցիչները պետք է ներկայացնեն ծրագրային ու ֆինանսական բավարար տեղեկատվություն, այդ տեսակետից նախընտրելի կլիներ, որ ֆինանսական հատվածն ավելի բաց ու թափանցիկ ներկայացվեր:

«Հանրայինը վարկային միջոցներ է ներգրավել, սակայն 807 մլն դրամ ուղղել է վերազինմանը, և պետբյուջեով փակվել են այդ վարկային միջոցները: Ցանկալի կլիներ ավելի մանրամասն տեղեկություններ հաղորդեին` դրա հետ կապված»,- ասաց Արծվիկ Մինասյանը: Նա դրական գնահատեց Ջավախքի մասին հաղորդումը` կարևորելով, առհասարակ, համահայկական տարողություն ունեցող խնդիրների ընդլայնումը Հանրայինի եթերում: Կարևորեց հայկական սփյուռքի վերաբերյալ խնդիրներ արծարծող և այդ խնդիրների լուծման տարբերակներ ներկայացնող հաղորդումները:

Անդրադառնալով Հանրայինի քաղաքական հաղորդումներին` Արծվիկ Մինասյանը կարծիք հայտնեց, որ պետք է պատրաստվեն այնպիսի քաղաքական հաղորդումներ, որտեղ կներկայացվի քաղաքական ուժերի ու պառլամենտականների ուղիղ խոսքը, այլ ոչ միայն մեկնաբանություններ լինեն «Հայլուր»-ի սահմանափակ րոպեների ընթացքում: «Անաչառություն ապահովելու լավագույն ձևը ուղիղ խոսքը եթեր տալն է` առանձին հաղորդումներ պատրաստելու միջոցով, սա Սահմանադրության պահանջն է և օրենքով ամրագրված պահանջ»,- ասաց Արծվիկ Մինասյանը:

ՀԱԿ խմբակցության պատգամավոր Արամ Մանուկյանը անդրադարձավ այն վարկային միջոցներին, որոնք վերցրել էր Հանրային հեռուստաընկերությունը: «Ինչո՞ւ եք այդ վարկը վերցրել, եթե նախատեսված չէր այն, և ինչո՞ւ է կառավարությունն այդ վարկը փակել իր պահուստային ֆոնդից: Ովքե՞ր են վճարել վարկի տոկոսները»,- հարցրեց նա:

Պատգամավորը նշեց, որ Հանրայինը 3,6 միլիարդ դրամ գումար է ստանում բյուջեից, սակայն ամենառեյտինգայինը չէ, որովհետև Հանրայինից առաջ «Արմենիա»-ն և «Շանթ»-ն են ռեյտինգային վարկանիշում: Նա քննադատեց Հանրայինի քաղաքական հաղորդումները, որովհետև, ըստ պատգամավորի, Հանրայինը միակողմանի է լուսաբանում քաղաքական, հասարակական կյանքի խնդիրները կամ առհասարակ չի լուսաբանում:

«Հանրապետությունը եռում էր կենսաթոշակային բարեփոխման դեմ բողոքի ալիքից, բայց ձեզ համար` եղած-չեղած, լուսաբանում էիք կառավարության ռեկլամները կենսաթոշակային բարեփոխման մասին: Եթե միակողմանի պետք է ներկայացնեք, ապա ռեյտինգ չեք ունենա: Մենք հանրահավաքներ ենք անում, ներկայացնո՞ւմ եք, արդյոք, այդ հանրահավաքները և դրանցում արծարծվող խնդիրները, չէ՞ որ դա հանրության մի մասն է, չէ՞ որ ձեր առաքելությունը հանրային բոլոր շերտերի ներկայացումն է: Քանի օր է` մարդիկ բողոքում են շրջանառության հարկի դեմ, կրկին հանրայինը չի լուսաբանում: Շեշտը դնում եք մշակութային ու կրթական հաղորդումների վրա, շատ ճիշտ եք, բայց նաև խնդիրներին պետք է օպերատիվ ու անաչառ արձագանքել, բայց Հանրայինը  այդ խնդիրը չի կատարում»,- ասաց Արամ Մանուկյանը` հավելելով, որ խոսքը բացախոսությանը և այլակարծությանը տեղ տալու մասին է, որը Հանրայինում բացակայում է: