Բաղդասարովի «Միկա» ակումբը կհետևի՞ մարզահամալիրի օրինակին

Այսօր հայտնի դարձավ , որ գործարար Միխայիլ Բաղդասարովին պատկանող «Միկա» մարզահամալիրը հանվել է հարկադիր աճուրդի: Մարզադաշտը վաճառվում է 9 մլրդ դրամով, աճուրդը կավարտվի սեպտեմբերի 4-ին:

Yerkir.am-ին «Միկա» ակումբից հայտնեցին, որ թիմն այսօր սովորականի նման իր մարզումներն է իրականացնում «Միկա» մարզադաշտում, իսկ թե վաճառքից հետո որտե՞ղ կամ ընդհանրապես կանցկացնե՞ն մարզումներ, առայժմ հայտնի չէ: Մեզ հետ զրույցում ակումբի գլխավոր մենեջեր Նիկոլայ Մուսայելյանը նշեց, որ մինչ այժմ չի քննարկվել այդ հարցը:

Մեր տեղեկություններով` առաջիկայում վաճառքի կհանվի նաև Բաղդասարովին պատկանող «Միկա» ակումբը: Այս տեղեկությունը մեզ հետ զրույցում ո'չ հերքեց, ո'չ հաստատեց Մուսայելյանը` նշելով, որ ստույգ որևէ բան չգիտեն: Մարզադաշտի վաճառքի վերաբերյալ պարզաբանումներ փորձեցինք ստանալ  «Միկա Լիմիթեդ» ընկերությունից, սակայն աշխատակիցները խուսափում էին պատասխանել մեր հարցին:

Հիշեցնենք, որ Բաղդասարյանի բիզնեսում անհաջողությունները սկսվեցին նրան պատկանող «Արմավիա» ընկերության սնանկացումից հետո: Իսկ այս տարեսկզբին էլ տեղեկություններ տարածվեցին ռուսական «Ռոսնեֆտ» ընկերության կողմից Բաղդասարովի «Միկա Լիմիթիդ»-ի նավթային ակտիվները ձեռք բերելու մասին: