«Թամարայի» արտադրատեսակների արգելքը լրիվ հանվեց, «Ձյան փաթիլներինը»` ոչ

Գյուղատեսության նախարարության սննդամթերքի անվտանգության պետական ծառայության պետի մայիսի 30-ի որոշումով արգելվել էր «Ձյան փաթիլներ» ԱԿ-ի կողմից «Պաղպաղակ մուլտիկ», «Պաղպաղակ 0,5 փաթեթով», «Պաղպաղակ կլասիկ» և «Պաղպաղակ մանկական» արտադրատեսակների արտադրությունը: Միաժամանակ կազմակերպությանը հանձնարարվել էր վերացնել հայտնաբերված խախտումները:

Որոշմամբ տրված առաջադրանքները մասամբ են կատարվել: Դրա վերաբերյալ Սննդամթերքի անվտանգության պետական ծառայություն է ներկայացվել ՍԱՊԾ «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ-ի փորձարկման արձանագրությունը: Ուստի, ՍԱՊԾ պետի հունիսի 12-ի որոշմամբ վերացվել է արգելանքը միայն «Պաղպաղակ 0,5 փաթեթով» և «Պաղպաղակ մանկական» արտադրատեսակների արտադրության մասով:

Հիշեցնենք, որ «Ձյան փաթիլներ» ԱԿ-ի կողմից «Պաղպաղակ մուլտիկ» և «Պաղպաղակ կլասիկ» արտադրատեսակների արգելանքը դեռևս գործում է:

ՍԱՊԾ պետի մայիսի 30-ի հրամանով արգելվել էր նաև «Թամարա» ՍՊԸ-ի կողմից «Քսան Կոպեկ», «Կարմեն» և «Թթվասեր 200գր.» արտադրատեսակների արտադրությունը: ՍՊԸ-ի տնօրենին տրվել էր հանձնարարական՝ վերացնելու հայտնաբերված խախտումները: Նմուշը և նրան համապատասխանող խմբաքանակը ոչնչացվել էր:

Որոշմամբ տրված առաջադրանքները կատարվել են: Դրա վերաբերյալ ՍԱՊԾ է ներկայացվել ծառայության համապատասխան մասնագետի եզրակացությունը: Ուստի, վերը նշված որոշմամբ սահմանված արգելանքը ծառայության պետի հունիսի 11-ի որոշմամբ վերացվել է: Այս մասին հայտնում է ՍԱՊԾ-ի կայքը: