Ոստիկանությանը հայտնի է Զեյթունում կրակոցներ արձակած քաղաքացու ինքնությունը

ՀՀ ոստիկանությունն անդրադարձել է երեկ երեկոյան Քանաքեռ-Զեյթուն վարչական շրջանում տեղի ունեցած միջադեպին: Yerkir.am-ին ոստիկանությունից հայտնեցին, որ ժամը 23.00-ին, ոստիկանության Երևան քաղաքի վարչության օպերատիվ կառավարման կենտրոնից Քանաքեռ-Զեյթունի բաժնում հաղորդում է ստացվել, որ իրենց է զանգահարել անհայտ քաղաքացի և հայտնել, որ Պ. Սևակի և Կ. Ուլնեցու փողոցների խաչմերուկում կրակում են: Մեկնած օպերատիվ խումբը պարզել է, որ ժամը 22.50-ին Կ. ՈՒլնեցու փողոցի թիվ 74 շենքի բակում անհայտ անձանց միջև տեղի ունեցած վիճաբանության ժամանակ մի քաղաքացի ատրճանակից մի քանի անգամ կրակել է օդ, ինչից հետո վիճաբանողները դիմել են փախուստի:

Ոստիկանությունը պարզել է հանցագործությունը կատարելու մեջ կասկածվող քաղաքացու ինքնությունը: Այժմ օպերատիվ հետախուզական, քննչական գործողություններ են տարվում նրան հայտնաբերելու ուղղությամբ:

Նշենք, որ դեպքի վայրի զննությամբ հայտնաբերվել են 9 մմ տրամաչափի ատրճանակի 3 պարկուճ և 1 գնդակ: Հայտնաբերվածն ուղարկվել է փորձաքննության: Կատարվում է նախաքննություն:

Հիշեցնենք, որ shamshyan.com-ին հավաքվածները պատմել են, որ  կրակոցներն արձակել է Երևանի քաղաքապետի խորհրդական, Քանաքեռ-Զեյթունի նախկին թաղապետ Արայիկ Քոթանջյանի որդին: