Ինչո՞ւ է Ավետարանչական ընկերությունը անվտանգության չափանիշներին չհամապատասխանող կաթ ներմուծում Հայաստան

Մայիսի 30-ին ՀՀ գյուղատնտեսության նախարարության սննդամթերքի անվտանգության պետական ծառայությունը հաղորդագրություն էր տարածել, ըստ որի` մայիսի 14-ին Բագրատաշենի սահմանային հսկիչ կետով ԱՄՆ-ից բարեգործական նպատակներով փորձ է արվել ներմուծել «SIMILAC» ապրանքանիշի 2787,84 կգ սոյայի հիմքով մանկական սնունդ, որի ներմուծումը չի թույլատրվել: Բանն այն է, որ մանկական սնունդը մեզոֆիլ աերոբ և ֆակուլտատիվ անաերոբ մանրէներ (ՄԱՖԱՄ) և խմորասնկեր ցուցանիշների մասով չի համապատասխանել ՀՀ առողջապահության նախարարի` 2010 թ. մարտի 10-ի N06-Ն հրամանով հաստատված մանկական սննդամթերքի սննդային արժեքին և անվտանգությանը ներկայացվող հիգիենիկ պահանջներին:

Այսօր լրագրողների հետ հանդիպման ժամանակ Քայքայիչ պաշտամունքներից տուժածների օգնության և վերականգնողական կենտրոնի տնօրեն Ալեքսանդր Ամարյանը հայտնեց, որ մանկական սնունդ ներկրողը «Ամերիկայի հայ Ավետարանչական ընկերության» «Հայ մանուկների կաթ ֆոնդն» է եղել: Այդ սնունդից ամեն ամիս բարեգործական նպատակներով շուրջ 440 ընտանիք է օգտվում:

«Ինչ է ստացվում` կրոնական կառույցները դիտմամբ դեբիլացնում են մեր երեխաներին, անառողջ սնունդ են մատակարարում` իբր թե օգնություն են անում: Օրենքով սահմանված է` կրոնական կառույցի գոյությունը կարելի է, եթե այն բնակչության առողջությանը վտանգ չի ներկայացնում, իսկ ի՞նչ է վերոնշյալը, մի՞թե երեխաների առողջությանը վտանգ սպառնալը էական չէ»,- ասաց Ամարյանը:

Նա տեղեկացրեց նաև, որ, որքան էլ զարմանալի է, իրավապահ մարմինները տվյալ հարցով չեն զբաղվում, ուղղակի արգելվել է ապրանքի տվյալ չափաբաժինը Հայաստան ներմուծել: