Ավետարանչական եկեղեցուն պետք չէ պայքարող հոգևորական, այլ մեկը, ով կծածկի մյուսների արածը

Դեռեւս 2013-ին Հայ ավետարանչական ընկերակցությունը աշխատանքից հեռացրել և կարգալույծ էր արել Արագածոտնի մարզի Հայ-ավետարանչական մասնաճյուղի ղեկավար` վերապատվելի Արմեն Միքայելյանին:

Լրագրողների հետ հանդիպման ժամանակ Միքայելյանը նշեց, որ արդեն մեկ տարի է անցել, բայց ցավը չի անցել, որովհետև Ավետարանչական եկեղեցու կանոնադրության մեջ չկա նման տող, որ ինչ-որ մեկին ինչ-որ պատճառներով կարող են կարգալույծ անել:

«Ձեռնադրությունը Աստծո կողմից է լինում, և միայն Աստված կարող է այն ի չիք համարել: Ինձ կարգալույծ են արել գաղտնիությունը չպահելու համար: Ի՞նչ գաղտնիության մասին է խոսքը, կրոնական կառույցում ի՞նչ գաղտնիքներ պետք է լինեն: Ես ընդամենը փորձում էի մաքրել եկեղեցին նրանցից, ովքեր ի շահ իրենց էին ծառայում, այլ ոչ թե եկեղեցուն էին սպասարկում»,- ասաց նա:

Միքայելյանը նշեց նաև, որ երբ նախորդ տարի նույն եկեղեցուն պատկանող «Շողիկ» ճամբարում սեռադաստիարակության դասընթաց է եղել, ինքը դրան դեմ է դուրս եկել, ասել, որ անկարելի է նման բան անել,` մանավանդ` առանց երեխաների ծնողների իմացության: Ննա զարմացած է` եթե իր դեմ ինչ-որ բան ունեին, ինչո՞ւ էին փակում նաև Արագածոտնի մարզի իրենց եկեղեցին և արդյո՞ք իրավունք ունեն զրկելու հավատացյալ ժողովրդին եկեղեցուց:

«Ես դիմել եմ Ազգային անվտանգության խորհուրդ, այնտեղից հարցս ուղղվել է արդարադատության նախարարություն, որտեղից էլ նշել են, որ, դա, այո, անօրինական է: Ես կարծում եմ, որ եկեղեցու սպասավորը չպետք է լինի ծխող ու խմող, ես պայքարում էի նրանց դեմ, բայց պարզվեց` նրանց պետք չի պայքարող հոգևորական, պետք են առաջնորդներ, ովքեր ծածկում են մեկը մյուսի արածը»,- ասաց Միքայելյանը:

Նա տեղեկացրեց նաև, որ հիմա էլ շարունակում է իր գործը մարզի հավատացյալների հետ, քանի որ ինքը Ավետարանչական եկեղեցու ղեկավարներին է դեմ, նրանց գործունեությանը, այլ ոչ թե` գաղափարին: