Շատ դեպքերում Միկոյանի արածը դրական է հայ ժողովրդի համար. Տարոն Մարգարյան

Այսօր Հաղթանակի այգում մայիսի 9-ի տոնական միջացառմանը ներկա էր նաեւ Երեւանի քաղաքապետ Տարոն Մարգարյանը: Լրագրողները եւս մեկ անգամ փորձեցին պարզել, թե ինչո՞ւ է որոշվել մայրաքաղաքում կանգնեցնել Անաստաս Միկոյանի արձանը:

Yerkir.am-ի թղթակիցը տեղեկացնում է, որ Տարոն Մարգարյանը նախ նշեց, որ ինքն իր դիրքորոշումն արտահայտել է քվեարկության միջոցով, հետո ընդգծեց, որ հարգում է մշակույթի հանձնաժողովի դրական եզրակացությունը՝ արձանը տեղադրելու հետ կապված:

Լրագրողների այն դիտարկմանը, որ բազմաթիվ բացասական փաստեր են հրապարակվում` Միկոյանի անվան հետ կապված, Տարոն Մարգարյանը հայտարարեց. «Դա պատմաբանների խնդիրն է, եւ պատմաբանները պետք է ներկայացնեն, որովհետեւ շատ դեպքերում Միկոյանի արածը դրական է հայ ժողովրդի համար: Փաստեր են բերում` Միկոյանի հետ կապված, որոնք մենք չենք տեսել` այդ փաստերը, պարզապես լսել ենք»: