Ռուսական զորքը կներխուժի՞ Ղարաբաղ. Washington Post

«Ռուսաստանի կողմից Ղրիմի անեքսիան մեկ մոռացված ճշմարտություն վեր հանեց` աշխարհում կան շատ գորշ գոտիներ, և այդ վիճելի տարածքները մտահոգության տեղիք են տալիս, քանի որ դրանց չորոշված կարգավիճակը հաճախ հակամարտության համար կայծ է դառնում»,- գրում է The Washington Post-ը:

Միջազգային քաղաքականության հարցերով լրագրող Ադամ Թեյլորն իր հոդվածքում գրում է, որ այժմ, երբ պարզ դարձավ, որ Ղրիմը Ռուսաստանի մասն է` առանց միջազգային ճանաչման, թերթերի վերնագրերում նոր գորշ գոտի է հայտնվում: Բոլորի ուշադրությունը սևեռվել է  Ուկրաինայից այն   կողմ,  այն բանից հետո, երբ ԱՄՆ ՌՕՈՒ գեներալ Ֆիլիպ Բրիդլավը հայտարարեց, որ Մերձդնեստրը մոտ ժամանակներս կարող է թեժ կետ դառնալ:

Մերձդնեստրը, սակայն, ԽՍՀՄ-ի փլուզումից հետո մնացած գորշ գոտիներից միայն մեկն է: Կան նաև Աբխազիան, Հարավային Օսիան, Լեռնային Ղարաբաղը: Լեռնային Ղարաբաղը 1994-ից գտնվում է էթնիկ հայերի վերահսկողության ներքո, թեև այդ տարածքին հավակնում է Ադրբեջանը, և Հայաստանում ռուսական 102-րդ ռազմակայանի ներկայությունը զգալի սպեկուլյացիաների տեղիք է տալիս, թե ռուսական զորքերը կարող են միջամտել հակամարտությանը: