Թող «եթե»-ն հանի. Հրայր Թովմասյանը՝ Արմեն Ռուստամյանին

Հրայր Թովմասյանը չի ցանկանում ասել ավելին, քան իր մամուլի քարտուղարն է ասել: Այսպես պատասխանեց ՀՀ արդարադատության նախարար Հրայր Թովմասյանը լրագրողների այն հարցին, թե ի՞նչ կարծիք ունի իր արտահայտության կապակցությամբ ԱԺ ՀՅԴ խմբակցության ղեկավար Արմեն Ռուստամյանի արձագանքին:

Հիշեցնենք, որ լրագրողների այն հարցին, թե ի՞նչ կարծիք ունի արդարադատության նախարարը չորս ոչ իշխանական ուժերի՝ կառավարությանն անվստահություն հայտնելու նախաձեռնությանը, նա պատասխանել էր. «Ղալաթ են անում»: Ի պատասխան Արմեն Ռուստամյանը ասել էր. «Եթե բառարաններով են խոսելու, ուրեմն թող չնեղանա, որ ասենք` ղալաթ ես անում, չաթլախ»:

«Ամեն մարդ ինքն է իրեն գնահատական տալիս, դուք իրեն հարցրեք, եթե ինքը կհանի «եթե»-ները, կլինի էն, ինչ մամուլի քարտուղարս ասել է: Եթե առանց «եթե»-ի այդ բառն ասի, էն կստանա, ինչ ասել է մամուլի քարտուղարս»,- ասաց նախարարը:

Մեր այն հարցին՝ չի՞ համարում, որ իր արտահայտությամբ վիրավորել է 53 պատգամավորի, նախարարը պատասխանեց. «Ես եթե համարած լինեի, կասեի»:

Լրագրողների այն դիտարկմանը, որ ինքն էլ է «եթե»-ներով խոսում, նախարարը պատասխանեց. «Եթե»-ներով խոսելն արգելված չէ: Իրան դիմեք, թող ինքը իրա «եթե»-ն հանի… Մեր իրականության մեջ նման արտահայտություններն անպատասխան չեն մնում»: