Ինձ կհանդիպեք, երբ ես չեմ լինի. Վահան Վարդանյան

Այսօր ՀԳՄ-ում տեղի ունեցավ բանաստեղծ, դրամատուրգ Վահան Վարդանյանի մահվան տարելիցին նվիրված հուշ-ցերեկույթ:

ՀԳՄ նախագահ Էդվարդ Միլիտոնյանը yerkir.am-ի հետ զրույցում նշեց, որ Վարդանյանի ստեղծագործությունները հասուն ու խորը մարդու գործեր են` տարբեր ոճերով եւ թեմաներով գրված:

«Իր գործերի միջից մտածող մարդն է մեզ նայում, մտածող, խորը, պարզ ու ջինջ էությամբ մարդը: Նա իր «Նարցիս» ամսագրով կարողացավ գրականությունը խմանքով ծառայեցնել մեր ժամանակներին»,- ասաց Միլիտոնյանը:

ՀԳՄ անդամ Մերուժան Տեր-Գուլանյանն էլ, իր հերթին, նշեց, որ առաջին անգամ, երբ Վարդանյանն այցելել էր իրեն` «Գարունի» խմբագրություն, իր գործերից մեկն էր բերել, որ կարդան ու կարծիք հայտնեն: «Ես, սովորաբար, հեղինակի ներկայությամբ չեմ կարդում իր գործը, բայց երբ աչքս ընկավ տողերին` սկսեցի կարդալ, կարդացի ու հիացա: Վահանը որքան պինդ էր իր սկզբունքներում, այնքան փխրուն էր կյանքում»,- ասաց նա:

Տեր-Գուլանյանը նշեց նաեւ, որ մութ ու ցուրտ տարիներին, երբ «Գարունը» թպրտում էր իր վերջին շնչում, Վարդանյանը բացեց «Նարցիսը», որը եկավ վերակենդանացնելու մեր գրական դաշտը, եկավ մեզ փրկելու: