ՏՄՊՊ համակարգը թույլ չի տալիս, որ բավարար մրցակություն ապահովվի. Արծվիկ Մինասյան

ԱԺ նիստում ԱԺ ՀՅԴ պատգամավոր Արծվիկ Մինասյանը ներկայացրեց իր դիտողություններն ու նկատառումները ՏՄՊՊՀ տարեկան գործունեության վերաբերյալ:Նա նշեց, որ շատ ավելի արդյունավետ կլինի, եթե օրենքը փոփոխվի այնպես, որ ՏՄՊՊՀ նախագահն իր տարեկան ծրագիրը ավելի վաղ ներկայացնի ԱԺ քննարկմանը:

Անդրադառնալով Տնտեսական մրցակցության պաշտպանության մոդելին, նա նշեց, որ տնտեսական մրցակցությունը բնութագրիչ է այն երկրների համար, որտեղ շուկաները ձևավորվել են բնական ճանապարհով, այլ ոչ թե արհեստական մենաշնորհ ստեղծելու ճանապարհով: Հայաստանի առանձնահատկությունը, որպես անցումային տնտեսություն ունեցող երկիր, կայանում է նրանում, որ արդյունավետ է կիրառել հակամենաշնորհային օրենսդրություն, այլ ոչ տնտեսական մրցակցության պաշտպանության համակարգ: «Այսօր փոքր շուկայի պայմաններում հիմնական ապրանքների և ծառայությունների առումով, հիմնական պահանջարկ ներկայացնողը պետական կառույցներն են, պետական գնումների համակարգը: Սակայն տնտեսական մրցակցության պաշտպանության համակարգը թույլ չի տալիս, որ բավարար մրցունակություն ապահովվի: Ավելին, այս մարմինը պրակտիկայում վերահսկողություն չի սահմանում իրավական ակտերի վրա»,- ասաց պատգամավորը՝ հավելելով, որ դրա վառ ապացույցը կարմիր գծերի ավտոկայանատեղիների մրցույթն է, պետական գնումներով ձեռք բերված ապրանքների իրացումը և այլն:

Պատգամավորը նշեց նաև, որ տրասնպորտի գների քննարկման ժամանակ, որևէ մեկի մտքով չանցավ, որ դա պետք է դիտարկել ՏՄՊՊՀ լիազորությունների շրջանակում: «Ի՞նչ գործ ունի Երևանի քաղաքապետարանը, որ ստեղծում է մրցութային հանձնաժողով, որը պետք է որոշի հարյուր դրամ սակագինը բավարար է, թե ոչ: Եթե շուկան բաց լինի, նորմալ մրցույթ լինի, տնտեսվարողը ինքը կկարողանա առաջարկել արդյունավետ գին, այլ ոչ թե առաջ բերել արհեստական թվեր, որի դեմ դուրս է գալիս հասարակությունը»,- ասաց պատգամավորը: Արծվիկ Մինասյանի խոսքով՝ եթե հանձնաժողովը շատ տուգանքներ է կիրառել, նշանակում է իր կարգավորման մեխանիզմը արդյունավետ չէ. ինչ օգուտ այն փաստից, որ ձեռնարկություն գրանցելն ու լուծարելը հեշտացել է, եթե բազմաթիվ խանութներ են փակվում: