Աշոտյանն է որոշել ''ծառայությունից խուսափողների'' դեմ պայքարել …

Կառավարությունն այսօր հավանության արժանացրեց ԿԳ նախարար Արմեն Աշոտյանի ներկայացրած' «Զինապարտության մասին»  Հայաստանի Հանրապետության  օրենքում փոփոխություն կատարելու մասին» Հայաստանի Հանրապետության օրենքի նախագծին:

Նախագծի ընդունմամբ նպատակ է հետապնդվում միջպետական համաձայնագրերի շրջանակում օտարերկրյա բուհերում սովորող ՀՀ քաղաքացիներին ՀՀ ԿԱՌԱՎԱՐՈւԹՅԱՆ ՍԱՀՄԱՆԱԾ ԿԱՐԳՈՎ Եւ ԴԵՊՔԵՐՈւՄ տարկետում տրամադրել, որը ենթադրում է ՀՀ կառավարության համապատասխան  անհատական որոշումների ընդունում, որոնք իրավական առումով կունենան ավելի բարձր իրավաբանական ուժ, քան տեղեկանքները:

«Զինապարտության մասին»  գործող օրենքի 14-րդ հոդվածի 1-ին մասի «գ» կետով` պարտադիր զինվորական ծառայության զորակոչից ուսումը շարունակելու համար տարկետում տրվում է միջպետական և միջգերատեսչական համաձայնագրերով օտարերկրյա պետությունների բարձրագույն ուսումնական հաստատությունների ուսանողներին, օրդինատուրայում, ինտերնատուրայում, մագիստրատուրայում կամ ասպիրանտուրայում սովորողներին:

«Վերջին ժամանակներում ՀՀ-ում միջպետական եւ միջգերատեսչական համաձայնագրերի շրջանակներում սովորելու ցանկություն հայտնողների գերակշռող մասը արական սեռի  քաղաքացիներ են: Երեւույթի շարժառիթը հիմնականում հանդիսանում է պարտադիր զինվորական ծառայությունից խուսափելու հնարավորությունը, որն էլ իր հերթին խթանում է բնակչության արտագաղթը, ինչպես նաեւ հայրենիք չվերադառնալու հիմքեր է առաջացնում»,- նշվում է նախագծի հիմնավորումներում:

ՀՀ կրթության և գիտության նախարարությունը, ՀՀ պաշտպանության նախարարության հետ համաձայնեցնելով, հաղթողների ներկայացված ցուցակներից ՀՀ արական սեռի քաղաքացիներին  տրամադրում է տեղեկանք, «Զինապարտության մասին» օրենքի 14-րդ հոդվածի 1-ին մասի «գ» կետի համաձայն, պարտադիր զինվորական ծառայության զորակոչից տարկետման իրավունքից օգտվելու վերաբերյալ:

Միաժամանակ, օտարերկրյա պետությունների բարձրագույն ուսումնական կամ գիտակրթական հաստատություններ ընդունված ՀՀ քաղաքացիներին պարտադիր զինվորական ծառայության զորակոչից տարկետում տալու հարցը կանոնակարգելու նպատակով, ՀՀ կառավարության 2002 թվականի  օգոստոսի 29-ի N 1394-Ն որոշմամբ, հաստատվել է կարգ, որը  տարածվում է անձնական նախաձեռնությամբ օտարերկրյա պետությունների ուսումնական հաստատություններ ընդունված ՀՀ այն քաղաքացիների վրա, ում «Զինապարտության մասին» ՀՀ օրենքի 16-րդ հոդվածի երկրորդ մասին համապատասխան ուսումնառության ամբողջ ժամանակահատվածի համար ՀՀ կառավարության անհատական որոշումներով  տրվում է տարկետում' ՀՀ կրթության և գիտության նախարարության հետ պարտավորությունների կատարումն ապահովող գրավի  պայմանագիր կնքելու պայմանով' գրավ դրվող գույքի նվազագույն գինը սահմանվում է 8,5 մլն դրամ:

Պարտավորությունների կատարումն ապահովող գրավի պայմանագիր կնքելով տարկետում տրամադրելը, ըստ օրենսդրական նախաձեռնության հեղինակների, երաշխիք  կապահովի ՀՀ վերադառնալու, հայրենիքի նկատմամբ սահմանադրական պարտավորությունները կատարելու եւ ձեռք բերված գիտելիքները Հայաստանում ներդնելու համար:

Նախագծի ընդունման արդյունքում ակնկալվում է ձեւավորել համապատասխան օրենսդրական հիմքեր՝ օտարերկրյա բուհերում ուսում ստանալը պարտադիր զինվորական ծառայությունից խուսափելու միջոցի վերածելու դեպքերը բացառելու նպատակով` ակնկալելով, որ օտարերկրյա բուհում սովորելը ուղղված կլինի անձի՝ միայն կրթական կարիքները բավարարելուն: 

Ի դեպ, նշվում է նաեւ, թե, միաժամանակ,  զորակոչիկների սահմանափակ ռեսուրսների առկայության պայմաններում նախագծի ընդունումը  որոշ չափով կնպաստի զորակոչի կազմակերպման արդյունավետության բարձրացմանը: