Կառավարությունը որոշել է պայքարել էլեկտրաէներգիայի ապօրինի սպառման դեպքերի դեմ

Այսօր կառավարության նիստում հաստատվեց «Էլեկտրական էներգիայի բաշխման համակարգում էլեկտրական էներգիայի ապօրինի սպառման դեպքերում սպառված էլեկտրական էներգիայի քանակի հաշվարկման մեթոդիկան հաստատելու մասին» որոշումը:

Ըստ որոշման հիմնավորման՝ այսօրվա դրությամբ Հայաստանում ապօրինի սպառած էլեկտրաէներգիայի քանակի հաշվարկման մեթոդաբանություն գոյություն չունի: Ուստի անհրաժեշտ է մշակել ՀՀ կառավարության նորմատիվ որոշման նախագիծ, որը կարգավորող մարմնին և շահագործող կազմակերպությանը  հնարավորություն կտա  էլեկտրական էներգիայի սակագների հաշվարկի ժամանակ տարանջատելու անխուսափելի կորուստներն այլ կորուստներից և վերականգնելու ապօրինի սպառման հետևանքով կրած վնասները:

Վերջին շրջանում նկատվում են էլեկտրաէներգիայի ապօրինի սպառման դեպքեր, ինչը հայտնաբերվում է շահագործող կազմակերպության կողմից: Սակայն ապօրինի սպառած էլեկտրաէներգիայի քանակը որոշել հնարավոր չի լինում համապատասխան նորմատիվ ակտի բացակայության պատճառով: Ուստի անհրաժեշտ է մշակել նորմատիվ իրավական ակտ, ինչը հիմք կհանդիսանա ապօրինի սպառած էլեկտրաէներգիայի հաշվարկման ժամանակ: 

Որոշումը կնպաստի ՀՀ օրենսդրության  շրջանակներում   էլեկտրամատակարարման համակարգից ապօրինի կերպով  էլեկտրական էներգիայի սպառման կանխարգելմանն ու համապատասխան վնասների վերականգնմանը, կկանխարգելի էլեկտրամատակարարման համակարգից ապօրինի կերպով էլեկտրական էներգիայի սպառումը: