Եթե մարդը վախճանվի, նրա կուտակած թոշակը կստանան ժառանգները

Հայաստանում պարտադիր կուտակային կենսաթոշակային ֆոնդերն օրենսդրորեն սահմանափակված են. կառավարությունում տեղի ունեցած մամլո ասուլիսի ժամանակ ասաց կառավարության աշխատակազմի ղեկավար-նախարար Վաչե Գաբրիելյանը:

Ըստ այդմ' ֆոնդերի ակտիվների  միայն 40 տոկոսով կարող են դրսում ներդրումներ կատարվել, իսկ 60 տոկոսով` երկրի ներսում: Հիմնական պատճառն այն է, որ այս հարաբերակցությունը փոխարժեքային տատանումների համար բնական ապահովագրություն է համարվում, քանի որ այդ համամասնությունում  ապահովությունը պահպանվում է: Իսկ երկրորդ պատճառն այն է, որ բաժնետոմսերի շուկան պետք է դեռ զարգանա  Հայաստանում, իսկ դրսում կան բարձրակարգ բաժնետոմսեր, որոնք բարձր եկամուտներ կարող են ապահովել' այդ ակտիվների կառավարման տեսակետից:

ԿԲ փոխնախագահ Ներսես Երիցյանն էլ նշեց, որ նոր համակարգով մարդիկ իրենց ներդրումները կանեն տարբեր ակտիվներում, որպեսզի դիվերսիֆիկացնեն դրանք: Ակտիվների կառավարչի սնանկացումն էլ, ինչպես հավաստիացնում են կառավարության ներկայացուցիչները, որեւէ ազդեցություն չի ունենալու կուտակված միջոցների վրա, քանի որ յուրաքանչյուր մարդու անձնական հաշիվները տրվում են մասնավոր կառավարչի, բայց` պետության հսկողությամբ ու երաշխավորությամբ:

«Փողի շարժը գանձապետարանից դեպի ակտիվի կառավարում, կատարվելու են պրոֆեսիոնալների միջոցով` սկզբում «Նասդաք Օ-ԷՄ-ԷՔՍ»-ի, իսկ հետո` պահառու բանկերի: Քաղաքացին ունի պորտֆելի դիվերսիֆիկացման հնարավորություն: Ի՞նչ կլինի, երբ ակտիվի կառավարիչը սնանկանա, ոչինչ. ակտիվի մեկ այլ կառավարիչ կգա, արժեթղթերը կփոխանցվեն նրան, ու նորից գործառույթները կկատարվեն»,- նշեց Ներսես Երիցյանը:

Այս պարագայում, պարզաբանեց նա, տարբեր տեսակի արժեթղթերում ու ոլորտներում են  ներդրումներ լինելու, եւ տարբեր տեսակի սնանկացումներն ու կորուստները չեն անդրադառնալու քաղաքացու վրա: Պետությունը նաեւ երաշխավորում է նոմինալ կենսաթոշակը: Այսինքն` պետությունը կենսաթոշակային տարիքում մարդկանց վճարելու է իրենց կուտակած թոշակը' գումարած գնաճը, ապա երաշխավորման ֆոնդից փոխանցվելու է պահանջվող գումարը:

Որպեսզի քաղաքացիների փողերը ավելի ապահով լինեն ֆինանսական շուկաներում ու չկորչեն, կան նաեւ սահմանափակումներ, թե մեկ թողարկողի մոտ ու մեկ երկրում որքան ակտիվներ կարող են կուտակվել. մի գործիքում այդ սահմանափակումը 10-20 տոկոսից ավելի կուտակումն արգելելն է, իսկ մյուս գործիքում' 5 տոկոսը:

Բացի այդ, հավաստիացրեց Երիցյանը, օրական կտրվածքով ԿԲ-ն համագործակցելու է միջազգային հեղինակավոր դեպոզիտարիայի հետ, ու այդ համագործակցության շնորհիվ իմանալու ենք, թե դրսի ու ներսի թղթերը որտեղ են ներդրվել, եւ քաղաքացիները կարող են տեսնել, թե իրենց պորտֆելներն ինչպիսի փոփոխություններ են ունենում:

Ինչ վերաբերում է հարցին, թե ինչ պետք է լինի այն դեպքերում, երբ մարդը կուտակել է բավականին միջոցներ, բայց մինչեւ կենսաթոշակային տարիքի հասնելը վախճանվել է, կամ երկարակյաց է ու ավելի շատ փող պետք է ստանա, քան հասցրել է կուտակել իր կյանքի ընթացքում:  Չօգտագործված գումարները, նշեցին կառավարության ներկայացուցիչները,  կվերադարձվեն ժառանգներին, իսկ եթե քաղաքացիները երկարակյաց լինեն, ապա կշարունակեն ապահովված ապրել, քանի որ դա համարվում է  հիմնադրամի ռիսկերից: