Այս պահից սկսած` Հայաստանում քաղբանտարկյալ չկա. Լևոն Զուրաբյան

Վերաքննիչ դատարանից համաներմամբ ազատ արձակված ՀԱԿ ակտիվիստ Տիգրան Առաքելյանը լրագողների հետ զրույցում հայտարարեց, որ ինքն այսուհետ ավելի ակտիվ է պայքարելու ռեժիմի դեմ: Նա հարցրեց լրագրողներին, թե ինչո՞վ է պայմանավորված այդքան շատ լրագրողների ներկայությունն այդ նիստին, այն դեպքում, երբ իր մասնակցությամբ մյուս դատական նիստերին շատ քիչ թվով լրագրողներ էին ներկա լինում: Նա միաժամանակ հայտարարեց, որ այսօր Վերաքննիչ դատարանի առջև սպասելու է, մինչև ազատ արձակվի ազատամարտիկ Վոլոդյա Ավետիսյանը:

Նշենք, որ Ավետիսյանի գործով նրա պաշտպանի բողոքի քննությունը նշանկված է ժամը 17:00-ին:

ԱԺ ՀԱԿ խմբակցության ղեկավար Լևոն Զուրաբյանն էլ կոչ արեց հավաքվածներին այսօր` ժամը 18:00-ին, հավաքվել Սարյանի արձանի դիմաց` Տիգրան Առաքելյանին լսելու: Նա իր խոսքում հայտարարեց նաև, որ այս պահից սկսած` Հայաստանում քաղբանտարկյալ չկա: Նշենք, սակայն, որ Վոլոդյա Ավետիսյանի ընկերները հայտարարում են, որ նա քաղբանտարկյալ է: