Նոր եւ անհայտ պոչամբար

Լուսանկարում պատկերված տարածքը գտնվում է «Հրազդան» ՋԷԿ-ի հետնամասում` Հրազդան քաղաքի` դեռեւս խորհրդային ժամանակներից մեզ մնացած ավտոտրանսպորտային համալիրի մոտակայքում:

Կոտայքի մարզի Կաքավաձոր համայնքում, որը նույնպես մոտ է վերոհիշյալ տարածքին, մեզ տեղեկացրեցին, որ լուսանկարում պատկերված` ոսկու կորզման արդյունքում առաջացած պոչերը կուտակվել են դեռեւս 2011 թվականին: Փոքրիկ պոչամբարի կողքին մինչ օրս կանգնած է կորզման ֆաբրիկան, որի պահակը, չիմանալով, թե ով ենք, նախ ասաց, որ չի կարելի նկարել, իսկ հետո` թե չգիտի, թե տերերն ովքեր են: Պահակը նաեւ հաստատեց, որ ֆաբրիկայում ոսկի են կորզել: «Հիմա չի աշխատում, իսկ երբ էլի կաշխատի, չգիտեմ»,- ասաց նա:

Սակայն մեր տեղեկությունների համաձայն` ոսկու կորզիչ ֆաբրիկան պատկանում է բարձրաստիճան մի պաշտոնյայի, ով Կոտայքի մարզում հանքավայր ուսումնասիրելու համար ՀՀ էներգետիկայի եւ բնական պաշարների նախարարությունից տարիներ առաջ ստացել է ընդամենը երկրաբանական ուսումնասիրության լիցենզիա, որը չի նշանակում, որ նույն անձնավորությունը պետք է զբաղվի հանքաքարի արդյունահանմամբ եւ  մշակմամբ:

Գալուստ ՆԱՆՅԱՆ

Լուսանկարները` հեղինակի