Սպանել են Հրանտ Մաթևոսյանի եղբորորդուն

Մայիսի 15-ի գիշերը սպանություն է կատարվել Վանաձորում:

Ոստիկանության լրատվական բաժնից հայտնում են, որ մայիսի 15-ին` ժամը 22.30-ին, հիվանդանոցից ոստիկանության Վանաձորի բաժնում հաղորդում է ստացվել, որ կրծքավանդակի ծակած-կտրած թափանցող վերքով հիվանդանոց է ընդունվել տղամարդու դիակ:

Պարզվել է, որ նույն օրը` ժամը 22.00-ի սահմաններում, անհայտ անձը Վանաձորի Բաղրամյան փողոցում սպանել է 35-ամյա Թովմա Մաթևոսյանին:

Ոստիկանության Լոռու մարզային վարչության և Վանաձորի բաժնի ծառայողների ձեռնարկած միջոցառումների շնորհիվ պարզվել է, որ մայիսի 15-ին` ժամը 22.00-ի սահմաններում, Բաղրամյան փողոցի թիվ 21/15 հասցեում գտնվող «Գանձակ» սուպերմարկետի մոտ, վիճաբանության ժամանակ, Թ. Մաթևոսյանին սուր-կտրող-ծակող գործիքով, ապօրինաբար կյանքից զրկելու դիտավորությամբ, հարվածել և սպանել է 37-ամյա Տիգրան Մ.-ն: 

Փաստի առթիվ ոստիկանության քննչական գլխավոր վարչության Լոռու մարզի քննչական բաժնում հարուցվել է քրեական գործ՝ ՀՀ քր.օրի 104 հոդվածի հատկանիշներով` «սպանություն», կատարվում է նախաքննություն: 

Panorama.am-ի թղթակցի հետ զրույցում Ահնիձոր գյուղի գյուղապետ Վանիկ Քառյանը տեղեկացրել է, որ Թովմա Մաթևոսյանը հայ մեծանուն գրող Հրանտ Մաթևոսյանի եղբորորդին է: