Կհրատարակվի Հրանտ Մաթևոսյանի անտիպների երկհատորյակը

Երեկ Հրանտ Մաթևոսյանի ծննդյան օրն էր: Yerkir.am-ի հետ զրույցում Մաթևոսյանի որդին` Դավիթ Մաթևոսյանը, նշեց, որ առաջիկայում Հրանտ Մաթևոսյանի անտիպ ստեղծագործությունները պետք է հրատարակեն երկհատոր գրքով:

Նա տեղեկացրեց, որ այդ ուղղությամբ աշխատանքներ են տանում և շուտով գրքի մակետը կհանձնեն մշակույթի նախարարությանը:

«Հետո արդեն կսպասենք հրատարակչական ծախսերի հատկացմանը: Կարծում եմ` մինչև տարեվերջ այն պատրաստ կլինի: Մաթևոսյանի անտիպները մոտավորապես 1000 էջ են կազմում: Դրանից բացի` ունենք օրագրային նշումներ, նամակներ, որոնց վերծանման, ապա հրապարակել-չհրապարակելու էթիկական կողմի քննարկումներ պետք է անենք, որովհետև անդրադարձեր կան իրանությանը և ժամանակակիցներին, որոնց մասին թերևս վաղ է խոսել ու հրապարակել»,- ասաց Դավիթ Մաթևոսյանը:

Ըստ նրա` եթե ուզում ենք այս կամ այն մշակութային գործչի գնահատված լինելու մասին դատել, պետք է նայենք` ինչքանով է մշակույթն արժևորված հանրության կողմից: «Կարծում եմ, որ հականե-հավանե բառերով հրաշալի գնահատանքի են արժանացած մեր բոլոր արժանավոր արվեստագետները: Թե  մենք` նրանց մշակույթի կրողը, որքանով ենք գնահատում այն, կասեմ` ոչ, նրանք գնահատված չեն, որովհետև մենք այդպես չենք ապրում, նրանց պատվիրաններով չենք գոյատևում` փորձելով մեր երկրի քաղաքացին ու մեր երկրի տերը լինել»,- ասաց Մաթևոսյանը: