Իրանը կնախագահի ՄԱԿ-ի Զինաթափման հարցերով համաժողովը

Իրանը կգլխավորի ՄԱԿ-ի Զինաթափման հարցերով համաժողովը: Այդ նշանակումը սուր քննադատության է արժանացել միջազգային կազմակերպության բազմաթիվ անդամների կողմից: Նրանք պնդում են, որ դա վատ գաղափար է` հաշվի առնելով երկյուղները, որ Թեհրանը միջուկային զենք է մշակում. տեղեկացնում է mignews.com-ը:

Համաժողովում, որն անցկացվելու է մայիսի 27-ից հունիսի 23-ը, քննարկվելու են միջուկային անվտանգությանը, տիեզերքում սպառազինությունների մրցավազքին, ռադիոլոգիական զենքի արտադրությանը, զանգվածային ոչնչացման այլ զենքերի արտադրությանը եւ կուտակմանը վերաբերող հարցեր: Համաժողովի ընթացքում ընդունված բոլոր որոշումները հանձնարարականներ են լինելու:

ՄԱԿ-ում ԱՄՆ ներկայացուցչության մամուլի քարտուղար Էրին Պելթոնը հայտարարել է, որ երկիրը, որի նկատմամբ ՄԱԿ-ը միջուկային զենք մշակելու կապակցությամբ պատժամիջոցներ է սահմանել, չի կարող նախագահել նման համաժողովը: Նա հավելել է, որ ԱՄՆ ներկայացուցիչները չեն մասնակցի միջոցառմանը: