''Նուբարաշեն'' ՔԿՀ-ի աշխատակիցն ազատվել է աշխատանքից

Հայաստանի Հանրապետության արդարադատության նախարար Հրայր Թովմասյանի  հրամանով` ՀՀ ԱՆ «Նուբարաշեն» քրեակատարողական հիմնարկի անվտանգության ապահովման բաժնի երրորդ կարգի մասնագետ Ջիվան Վարդգեսի Օհանյանի նկատմամբ կիրառվել է ծառայությունից ազատում կարգապահական տույժը, և 2013 թվականի ապրիլի 3-ից նա ազատվել է քրեակատարողական ծառայությունից. հայտնում է ՀՀ արդարադատության նախարարությունը:

Օհանյանն աշխատանքից ազատվել է ծառայողական պարտականությունները ոչ պատշաճ կատարելու, դատապարտյալի և նրա հարազատների հետ անթույլատրելի կապերի մեջ գտնվելու, դատապարտյալին տեսակցության այցելած կնոջ՝ քրեակատարողական հիմնարկ մուտք գործելու ժամանակ հագուստների և անձնական իրերի զննությունը սահմանված կարգով չկազմակերպելու համար:

Նախարարի այս հրամանի համար հիմք են հանդիսացել ՀՀ ԱՆ «Նուբարաշեն» քրեակատարողական հիմնարկում անցկացված ծառայողական քննության արդյունքներով ներկայացված եզրակացությունը, ինչպես նաև ՀՀ ԱՆ քրեակատարողական վարչության պետ Հ. Հարությունյանի միջնորդությունը: