Հպարտ եմ, որ մարզում եմ Բուլղարիայի հավաքականը. Արմեն Նազարյան

Վրաստանի մայրաքաղաք Թբիլիսիում ավարտվեց ըմբշամարտի Եվրոպայի առաջնությունը: Հունահռոմեական ըմբշամարտում, թիմային հաշվարկով, առաջին տեղ զբաղեցրեց Ռուսաստանը, երկրորդ տեղում է Բուլղարիան, իսկ լավագույն եռյակը եզրափակեց Գերմանիան:

Հունահռոմեական ըմբշամարտի Բուլղարիայի ազգային հավաքականի գլխավոր մարզիչ, կրկնակի օլիմպիական չեմպիոն Արմեն Նազարյանը yerkir.am-ի հետ զրույցում խոսեց իր թիմի նվաճման մասին:

-Պարո'ն Նազարյան, շնորհավորում եմ Ձեզ ձեռքբերման համար: Սա Ձեր առաջին լուրջ փորձությունն էր Բուլղարիայի ազգային հավաքականը գլխավորելուց հետո, խոսեք խնդրում եմ այդ մասին:

-Այո, ես նոր եմ գլխավորել հավաքականը, և արդեն ունենք նման մեծ հաջողություն: Դա ինձ համար, իրոք, շատ մեծ ձեռքբերում է: Առաջին լուրջ ստուգատեսը, և մեկական ոսկի, արծաթ, բրոնզ:

-Նման հաջողության Բուլղարիայի հավաքականը  հասե՞լ էր երբևէ:

-Ոչ, չի եղել: Միշտ սկսել  են չորրորդ  տեղից: Շատ ուրախ եմ,  հպարտ եմ, որ ես հայ եմ և մարզում եմ Բուլղարիայի ազգային հավաքականը: Շնորհավորում եմ բոլորիս:

-Պարո'ն Նազարյան, նշել էիք, որ հացադուլը  կավարտեք այստեղ՝ Եվրոպայի առաջնության ժամանակ: Ի՞նչ եք կարծում, Ձեր բողոքը տեղ հասա՞վ:

-Հացադուլս արդեն ավարտել եմ, ինչպեսև նախապես ասել էի: Ես այստեղ հանդիպել եմ FILA անդամների հետ, ովքեր կիսում էին իմ, այսպես ասած, ցավը: Ասացին, որ ամեն ինչ նորմալ կլինի, խոստացան անել ամեն հնարավոր բան՝ պահպանելու ըմբշամարտը` որպես օլիմպիական սպորտաձև:

Շուշանիկ  ՀԱԿՈԲՅԱՆ

Թբիլիսի