Ասադի նախաձեռնությունը ուշացած է. սիրիական ընդդիմություն

Սիրիայի ներքին  ընդդիմությունը` ի դեմս Ազգային համակարգող հանձնաժողովի, նախագահ Բաշար Ասադի` սիրիական ճգնաժամից դուրս գալու ծրագիրը «անիրականանալի ու անիրատեսական» է համարում: Այդ մասին հանձնաժողովի ներկայացուցիչները հայտնել են Դամասկոսում երեկ տեղի ունեցած ասուլիսի ժամանակ. հայտնում է ИТАР-ТАСС-ը:

«Սիրիական ճգնաժամից դուրս գալը հնարավոր չէ առանց միջազգային կոնսենսուսի»,- ասել է հանձնաժողովի ղեկավար Հասան Աբդել Ազիմը` ընդգծելով ԱՄՆ-ի ու Ռուսաստանի միջև սիրիական հարցի շուրջ փոխհամաձայնության հասնելու կարևորությունը:

«Ասադի նախաձեռնությունը շատ ուշացած է: Ժողովրդի ու իշխանության, ինչպես իշխանության ու ընդդիմության միջև վստահությունը վաղուց արդեն չկա»,- ասել է նա: