Սիրիան ընդունել է կարգավորման արաբական նախագիծը

Սիրիան դրական պատասխան է տվել Արաբական պետությունների լիգայի նախաձեռնությանը, որը նախատեսում բռնության անհապաղ դադարեցում, բանտարկյալների ազատում եւ տանկերի դուրսբերում քաղաքներից. տեղեկացնում է ИТАР-ТАСС-ը:

Լիգայի «ճանապարհային քարտեզին» Դամասկոսի համաձայնությունը պայմանավորված է օտարերկյա միջամտությունից եւ ներքաղաքական ճգնաժամից խուսափելու ձգտմամբ:

«Սիրիան ընտրություն է կատարել հօգուտ արաբական աջակցության` հանուն միասնության պահպանման եւ կայունության ամրապնդման»,- Կահիրեում անցկացված միջարաբական արտակարգ խորհրդակցության ժամանակ հայտարարել է Սիրիայի դեսպան Յուսեֆ Ահմեդը:

Միաժամանակ, Կատարի վարչապետը զգուշացրել է, որ ԱՊԼ-ն «կրկին նիստ կհրավիրի եւ համապատասխան քայլեր կձեռնարկի, եթե Սիրիայի կառավարությունը լրջորեն չկատարի ստանձնած պարտավորությունները»:

Սիրիական ընդդիմությունը իշխանությունների այդ քայլը որակել է որպես ժամանակ շահելու փորձ: Ընդդիմադիրները ԱՊԼ-ից երաշխիքներ են պահանջում, նաեւ պնդում են, որ Ասադի վարչակազմը պետք է խաղաղ հանձնի իշխանությունը եւ պատասխանատվություն կրի իր գործողությունների համար:

Ի դեպ, Սիրիայի մի շարք քաղաքներում բազմամարդ հանրահավաքներ են անցկացվում հօգուտ նախագահ Բաշար Ասադի: