Ադրբեջանը դարձել է ՄԱԿ-ի ԱԽ ոչ մշտական անդամ

Երեկ ՄԱԿ-ի Գլխավոր ասամբելայում քվեարկություն է տեղի ունեցել Անվտանգության խորհրդի վերջին ոչ մշտական անդամին ընտրելու համար: Թեկնածուները երկուսն էին` Սլովենիան եւ Ադրբեջանը:

Ըստ 1news.az-ի` քվեարկության առաջին փուլում Ադրբեջանի օգտին հավաքվել է 116 ձայն, Սլովենիայի օգտին` 77: Քանի որ երկրներից ոչ մեկը չի հավաքել անհրաժեշտ 129 ձայնը, նոր քվեարկություն է նշանակվել: Սակայն հետագայում Սլովենիայի արտգործնախարար Սամուել Զբոգարը հայտարարել է, որ իր երկիրը հետ է կանչում իր թեկնածությունը:

Այդպիսով, առանց մրցակցի մնալով, նոր քվեարկության արդյունքում Ադրբեջանը դարձել է ՄԱԿ-ի Անվտանգության խորհրդի ոչ մշտական անդամ` 115 կողմ եւ 24 ձեռնպահ ձայներով, իսկ 13 երկիր, այնուամենայնիվ, քվեարկել է թեկնածությունը հանած Սլովենիայի օգտին:

ՄԱԿ-ի ԱԽ ոչ մշտական նոր անդամներ են դարձել նաեւ Գվատեմալան, Մարոկկոն, Տոգոն եւ Պակիստանը: