Օբաման հերթական ավտոբուսային շրջայցն է կատարելու

ԱՄՆ նախագահ Բարաք Օբաման այսօր նախատեսում է ավտոբուսով եռօրյա շրջայց կատարել Հյուսիսային Կարոլինա եւ Վիրջինիա նահանգներ` նոր աշխատատեղերի վերաբերյալ իր նախագծի քարոզչությունն իրականացնելու համար:

Այդ թեմային ԱՄՆ նախագահն անդրադառնում է իր յուրաքանչյուր ելույթում, նա մտադիր է դարձյալ Կոնգրեսի ուշադրությանը ներկայացնել այդ օրինագիծը, որը օրենսդիրներն օրերս մերժել են:

Ըստ ИТАР-ТАСС-ի` նախագահը շրջայցը կատարելու է նույն ավտոբուսով, որով օգոստոսին այցելել էր Մինեսոտա, Այովա եւ Իլինոյս նահանգները: Սեւ, զրահապատ, մգեցված ապակիներով ավտոբուսը ձեռք է բերվել ԱՄՆ հատուկ ծառայությունների կողմից եւ հագեցած է կապի բոլոր միջոցներով: Ավտոբուսի արժեքը 1,1 մլն դոլար է:

Նախագաի հակառակորդների կարծիքով` այդ գումարը կարելի էր ծախսել ավելի կարեւոր հարցերի լուծման վրա, սակայն Օբաման վստահ է, որ նման այցերն արդյունավետ կլինեն, եւ մտադիր չէ հրաժարվել դրանցից: