Մինասյան-Տրապատոնի` ճակատ ճակատի

Միջազգային մամուլը խոսում է Մինասյան-Տրապատոնի ճակատամարտի մասին: Ո՞ւմ կժպտա հաջողությունը, ո՞վ ավելի խելացի կլինի, ո՞ւմ հույսերը կարդարացվեն խաղադաշտում և ո՞վ կշրխկացնի դուռը դրսից:

Երիտասարդ արյուն, անձնուրացություն, բարձր խաղային որակներ. ահա այն ամենը, ինչի վրա կարող է հույս դնել Հայաստանը: Երիտասարդ մարզիչ, ով դրսևորել է իր մարտավարական մտածողությունը և որի առջեւ լուրջ առաջադրանք է դրված:

Ի՞նչ առավելություն ունի Իռլանդիան` տակտիկական հիանալի մտածողություն ունեցող մարզիչ և բարձրակարգ ֆուտբոլիստներ: Սակայն կորուստներ հակառակորդը ևս ունի:

Վերջին 8 հանդիպումներում Իռլանդիայի հավաքականն անառիկ է պահում իր դարպասը: Այդուհանդերձ, գլխավոր մարզիչ Ջովանի Տրապատոնին այդ փաստին շատ ուշադրություն չի դարձնում և կարծում է, որ  սպասվելիք խաղում ամենակարևորը հաջողության հասնելն է:

«Իմ թիմը երբեք չի խաղա ոչ ոքիի համար, մենք միշտ հաղթանակի համար ենք խաղացել: Այսպիսի խաղաոճով մենք կարող ենք հաղթել ամենալուրջ մրցակիցներին: Ես նախորդ 8 խաղերի մասին չեմ մտածում: Կարևորը վերջնական արդյունքն է»,- հայտարարել է իտալացի մասնագետը:

Հիշեցնենք, որ «կանաչ մարզահագուստով տղաներին» որոշիչ խաղում թիմի ավագ Ռոբի Քինը չի օգնի: Վերջինիս փոխարեն հարձակման գծում հանդես կգա Սայմոն Կոկսը, ավագի թևկապն էլ կկրի Շեյ Գիվենը:

Հայաստանի հավաքականում հակառակ պատկերն է` վնասվածներ չկան: Բոլորը պատրաստ են խաղին: «Ավիվայում» հնարավոր է, որ իր դեբյուտն ունենա «Այաքսի» տաղանդավոր հարձակվող Արաս Օզբիլիզը, ով միայն անցած շաբաթ հայկական անձնագիր ստացավ:

Վարդան Մինասյանի սաներն առաջին անգամ են այսքան մոտ կանգնում Եվրոպայի առաջնության շեմին: «Ես մակեդոնացիների դեմ խաղի որակից գոհ չեմ: Բայց երբ արդյունքն առաջնային է, լարվածությունից խուսափելն անհնար է»,- ասել է մեր հավաքականի մարզիչը: Իսկ Իռլանդիայի դեմ պայքարին հայերը մարտական են տրամադրված:

Մնաց միայն մեկ քայլ` վերջինը և ամենակարևորը: