ՀԱՅՈՑ ԱՇԽԱՐՀ. Երկրորդ "Մարտի 1-ի" նախերգանքը

Եվ այսպես. ՀԱԿ-ի վերնախավը երեկ ազդարարեց շուրջօրյա հանրահավաքների մեկնարկը` նստացույցային «գառնիրով», որը շարունակվելու է մեկ շաբաթ: Թատերական հրապարակում հավաքվածներին ՀԱԿ առաջնորդը անձամբ մաղթելով «յոթօրյա անմոռանալի տրամադրություն», ներկայացրեց ՀԱԿ-ի վարքականոնը, որին պարտավոր են հետեւել «ինքնաբուխ միջոցառման» բոլոր մասնակիցները:

Մինչեւ երեկ ՀԱԿ-ի ներկայացուցիչները հորդորում էին բոլորին մասնակցել սեպտեմբերի 30-ի հանրահավաքին` խորհրդավոր ակնարկելով, որ հրապարակ եկողները չեն հիասթափվի: Թեեւ դարձյալ քիչ թվով մարդիկ էին արձագանքել ՀԱԿ-ի հրավերին, այնուհանդերձ ղեկավարությունը որոշեց նրանց պահել հրապարակում` գործի դնելով այնքան չարչրկված «Հիմա» եւ «Սկսել ա» կարգախոսները:

Ակտիվիստներն անմիջապես ձեռնամուխ եղան վրանների տեղադրման աշխատանքներին, իսկ միտինգավորները տրամադրվեցին «երգի-պարի փառատոնային» մեկշաբաթյա միջոցառմանը: Մի խոսքով` միտինգային ելույթներից հետո, երեկ երեկոյան հրապարակում տիրող մթնոլորտն ու անցուդարձը, աստիճանաբար ուրվագծվող ընդհանուր տեսարանը հիշեցրեց 2008-ի փետրվարյան տասնօրյակը: Պակասում էին միայն վառարանները եւ Իսրայելի դրոշը, որոնք էլ հավանաբար շուտով մաս կկազմեն ընդհանուր պատկերին: