Բանակում պետք է օրենքը գործի

Օրենքը պետք է կատարվի հարյուր տոկոսով: Եթե օրենքը գործի բանակում, ապա կբացառվեն այն դեպքերը, որոնք կատարվում են այսօր: Օրենքը չպետք է գրվի եւ մնա թղթի վրա. այսօր լրագրողների հետ հանդիպման ժամանակ ասաց  ԱԺ պաշտպանության, ներքին գործերի եւ  ազգային անվտանգության մշտական հանձնաժողովի ղեկավար Հրայր Կարապետյանը:

Նա տեղեկացրեց, որ իր նախաձեռնությամբ երեկ տեղի է ունեցել աշխատանքային հանդիպում, որին մասնակցել են բարձրաստիճան զինվորականներ ու  հասարակական կազմակերպությունների ներկայացուցիչներ եւ քննարկել են վերջին շրջանում բանակում տեղի ունեցած միջադեպերը:

Հ. Կարապետյանը նաեւ հայտնեց, որ հանձնաժողովի նիստ է տեղի ունենալու նաեւ վաղը, որի ընթացքում քննարկվելու է «Զինակոչի մասին» եւ «Զինվորական ծառայության մասին» ՀՀ օրենքներում փոփոխություններ կատարելու հարցը: ԱԺ հանձնաժողովի նախագահը կարեւորեց ոչ միայն համապատասխան օրենքների ընդունումը, այլեւ դրանց մասին զինվորների եւ սպայական անձնակազմի իրազեկման մակարդակի բարձրացման հարցը:

Նա ցավով արձանագրեց, որ բանակում հաճախ գործում են այլ օրենքներ` թաղային ու գաղութային:

«Մեր բանակը պետք է լինի օրենքի շրջանակներում գործող և մարդիկ, ովքեր չեն համապատասխանում սպայի կոչմանը և չեն կարողանում առաքելություն իրականացնեն, պետք է բանակում չլինեն»,- ասաց նա:

ՀՅԴ պատգամավորի համար զարմանալի է այն հանգամանքը, որ պաշտոնյաները տեղի ունեցած միջադեպերին արձագանքում են միայն այն ժամանակ, երբ դրանք սկսում են լայնորեն քննարկվել սոցիալական ցանցերում: Այնինչ, նրա համոզմամբ, պաշտոնյաները պարտավոր են արձագանքել անմիջապես լրատվամիջոցի հրապարակմանը: