Խոսքը գործ չի դառնում

Երեկ խմբագրություն էին զանգահարել մի խումբ ծնողներ եւ խնդրում էին իրենց բողոքի ձայնը հասցնել պաշտպանության նախարար Սեյրան Օհանյանին:

Նախարարի հրամանով` ամիսը մեկ անգամ ծնողը կարող է այցելել զինծառայության մեջ գտնվող իր զավակին, տեսնել զորանոցը, որդու եւ զորամասի կեցության պայմանները` զորանոցից մինչեւ ճաշարան:

Նախորդ կիրակի բաց դռների օր էր Վանաձորի «Դուց» կոչվող զորամասում: Այստեղ ծնողներին դիմավորել են վայրենու պահվածքով: Չեն թողել, որ ծնողները մուտք գործեն զորամաս, անգամ պատսպարվելու տեղ չեն տվել, եւ մարդիկ ստիպված են եղել զավակներին տեսակցել, իրենց բնորոշմամբ, «չոլերի մեջ»` հորդառատ անձրեւի տակ: Բացի այդ` նախատեսված 4 ժամվա փոխարեն զինվորներին ընդամենը 1 ժամ 15 րոպե են դուրս թողել` 12:45-14:00, իսկ արձակման թերթիկում նշել են 11:00:

Ծնողները դժգոհում էին նաեւ, որ իրենց որդիները հնարավորություն են ունենում լողանալու ընդամենը երկու շաբաթը մեկ անգամ: «Մենք հեռու ենք, գիտենք, թե մեր երեխեքին լավ են նայում, գոնե մեր աչքի դեմը էդպես չանեին: Իրենք էլ ի՞նչ զգացումներով պետք է զորամաս վերադառնան ու ծառայեն»,- դժգոհում էին մեզ դիմած քաղաքացիները: