Ժողովուրդն այլևս խոսքերի հանրահավաք չի ակնկալում, նա սպասում է, որ խոսքը գործ դառնա. Ռուբեն Հակոբյան

Րաֆֆի Հովհաննիսյանը մասնակցելու է հոկտեմբերի 24-ի հանրահավաքին: «Երբեք կատեգորիկ դրված չի եղել այն հարցը, թե նա չի մասնակցելու այդ հանրահավաքին»,- այսօր լրագրողների հետ զրույցում ասաց ԱԺ «Ժառանգություն» խմբակցության ղեկավար Ռուբեն Հակոբյանը` պատասխանելով հարցին` հնարավո՞ր է, որ Րաֆֆի Հովհաննիսյանը չմասնակցի հաջորդ հանրահավաքին:

Պատգամավորի խոսքով` կարևորն այն է, որ հանրահավաքի հարթակը միասնական լինի, ունենա միասնական ծրագիր, միասնական ճանապարհային քարտեզ, ինչի վրա էլ եռյակը աշխատում է: Թեմատիկ առումով` եռյակի հարթակը լինելու է միասնական: 

«Ժողովուրդն այլևս խոսքերի հանրահավաք չի ակնկալում, նա սպասում է, որ խոսքը գործ դառնա, բայց` միասնական հարթակով, ոչ թե, որ այդ հարթակը դառնա դեբատների դաշտ»,- ասաց Հակոբյանը` հավելելով, որ չպետք է դառնալ լոզունգների գերի, հարկավոր է գնալ իշխանափոխության:

Հարցին` քննարկե՞լ են Զարուհի Փոստանջյանի առաջարկությունները եռյակի օրակարգի վերաբերյալ, նա պատասխանեց, որ «Ժառանգության» վարչությունում այդ առաջարկությունները չեն քննարկվել:

Վերջում պատգամավորը նշեց, որ եռյակի լիդերների հանդիպումը դեռևս ուժի մեջ է: