Նախ պետք է հաղթել Անդորրային

Հայաստանի ֆուտբոլի ազգային հավաքականը իր առաջին մարզումն անցկացրեց Եվրո-2012-ի ընտրական փուլի` Անդորրայի եւ Սլովակիայի հավաքականների դեմ խաղերից առաջ:

Մարզումից հետո պատասխանելով լրագրողների հարցերին` հավաքականի մարզիչ Վարդան Մինասյանը խոսեց թիմի առջև դրված խնդիրների մասին, որոնցից առաջինը` Անդորրայի հավաքականին հաղթելն է: Նաեւ խոսեց հավաքականի կորուստների մասին, մասնավորապես հայտնելով, որ Ռոբերտ Արզումանյանը ստացված վնասվածքի պատճառով չի կարողանա մասնակցել վերոնշյալ հանդիպումներին: Խոսվեց նաեւ հավաքականի նորեկ` ռուսական «Ուրալի» պաշտպան Դենիս Թումասյանի մասին, որն ,ըստ  գլխավոր մարզչի, վաղը կժամանի Երեւան եւ կնախապատրաստվի Անդորրայի դեմ խաղին: 

Սպասվող հանդիպումների մասին հարցեր ուղղեցինք նաև հավաքականի ֆուտբոլիստներից մի քանիսին: Դարպասապահ Ռոման Բերեզովսկին, մասնավորապես, ասաց. «Անդորրայի հավաքականի դեմ հանդիպումից առաջ հավատում և մեծ հույսեր եմ կապում, որ կկարողանանք հաղթել և 3 միավոր վաստակել, իսկ Սլովակիայի դեմ կփորձենք քաղել առավելագույնը, որպեսզի մինչև վերջ մնանք պայքարի մեջ: Իմ առողջական խնդիրներն արդեն անցյալում են, մեջքս ինձ այլևս չի անհանգստացնում»: 

Մարկոս Պիզելլին նույնպես հավատում էր մեր հաջողությանը. «Առաջին հերթին պետք է երեք միավոր վաստակենք, հետո մտածենք մեր հնարավորությունների մասին: Կարևորը առաջիկա խաղում հաղթանակն է: Հիմա գտնվում եմ լավ մարզավիճակում, չունեմ որևէ վնասվածք»: 

Հայաստանի հավաքականի գլխավոր հարձակողական ուժը համարվող Յուրա Մովսիսյանի տրամադրությունը առաջիկա խաղերից առաջ նույնպես լավ էր: 

«Իմ կարծիքով` մեզ համար շատ լավ է ամեն ինչ ավարտվելու: Երկու հավաքականների հետ էլ խաղացել ենք և  գիտենք, թե ոնց հաղթենք նրանց: Չեմ կարծում, թե ինչ-որ մի բան կարող է խանգարել մեզ»,- ասաց հարձակվողը:

Հիշեցնենք, որ Մովսիսյանը որակազրկված է և չի կարողանա օգնել հավաքականին Անդորրայի հավաքականի դեմ խաղում, սակայն Յուրան կխաղա Բրատիսլավայում` Սլովակիայի դեմ: Նա վստահությամբ հայտարարեց, որ Հայաստանի հավաքականն առանց իր օգնության էլ կկարողանա հաղթանակ տանել Անդորրայի նկատմամբ:

Հավելենք, որ Հայաստանի հավաքականն իր ընտրական երկու հանդիպումներն էլ կանցկացնի մրցակիցների հարկի տակ: Նախ` սեպտեմբերի 2-ին կհյուրընկալվի Անդորրային, այնուհետև` սեպտեմբերի 6-ին` Սլովակիային:

Ռազմիկ Հովհաննիսյան