Մի քիչ էլ ժողովրդի մասին մտածեք

Երեւանի մետրոպոլիտենի ուղեվարձի թանկացումը հասարակության շրջանում դժգոհությունների ալիք է բարձրացրել:

Այսօր ՀՀ սոցիալ-տնտեսական կյանքի, մասնավորապես` մետրոպոլիտենի ուղեվարձի վերլուծությամբ հանդես եկան Հայաստանի սպառողների ասոցիացիայի նախագահ Արմեն Պողոսյանը եւ Հանրային խորհրդի  ֆինանսատնտեսական եւ բյուջետային հարցերի հանձնաժողովի նախագահ Վազգեն Սաֆարյանը:

Մետրոյի թանկացման վերաբերյալ Ա. Պողոսյանը նշեց որ կա օբյեկտիվ պատճառ. «Մետրոն չէր զարգանում, այսօր դրանից օգտվողների թիվը 10-20 տոկոսով նվազել է: Տրոյլեբուսը «հոգեվարքի մեջ է»: Տրանսպորտում տիրող վիճակը ձեռնտու է 15-20 հոգու` գծի տերերին, որոնք ԱԺ-ում են»: Ըստ նրա` մետրոյի ղեկավարությունը նույնպես հրավիրված է եղել ասուլիսին, սակայն չի եկել:

Բանախոսները նշեցին, որ ութ օր առաջ բաց նամակով դիմել են վարչապետին եւ քաղաքապետին, սակայն մինչ օրս պատասխան չի ստացվել:

«Կան հարցեր, երբ չպետք է առաջնորդվել միայն բիզնեսով, հարկավոր է մի քիչ էլ  մարդկանց մասին մտածել»,- ասաց Վազգեն Սաֆարյանը:

Ինչ վերաբերում է տնտեսության ընդհանուր վիճակին, ըստ նրա` կայուն աճ է գրանցվել արդյունաբերական ոլորտում: Հիմնական շահույթը ստացվում է մետաղների արտահանումից: Իսկ գյուղատնտեսության վիճակն այնքան էլ հուսադրող չէ: «Ծիրանի առատ բերք էր սպասվում, բայց չէր նախատեսվում, որ հուլիս ամսին այսքան կթանկանար: Գյուղատնտեսությունում քիչ աշխատուժ ունենք»,- նշեց Վ. Սաֆարյանը:

Գոհար Փեփոյան