Ջավախքում հարց լուծողը ուժային կառույցներն են

Իրականությունն այն է, որ Ջավախքում խնդիրները լուծում են ուժային կառույցները. այսօր լրագրողների հետ հանդիպման ժամանակ նշեց ԱԺ պատգամավոր Շիրակ Թորոսյանը` հավելելով, որ տեղական ինքնակառավարման մարմինները պարզապես ձեւական բնույթ են կրում:

Ակտիվիստները կա'մ ձերբակալված են, կա'մ դատական քաշքուկների մեջ են. իշխանությունների համար ոչ ցանկալի կես բառն էլ բավական է դատական գործ հարուցելու համար:   

Շ. Թորոսյանն ասաց, որ տեղացիները վախի մթնոլորտում են ապրում, չեն կարողանում հանգիստ խոսել միմյանց հետ, քանի որ գյուղերում ստեղծված է գործակալական ցանց, եւ ամեն ասված բառը տարբեր միջոցներով հասցվում է ուժային կառույցներին:

Իսկ դատական գործերը ոչ միայն բարոյահոգեբանական, այլեւ ֆինանսական լուրջ խնդիրներ են առաջ բերում. դատական յուրաքանչյուր գործի դեպքում ստիպված են լինում 10-20 հազար լարի վճարել` պայմանական դատվածություն ստանալու կամ չազատազրկվելու համար: Ընդ որում, պայմանական դատվածներին արգելվում է հեռանալ երկրից,  մինչդեռ տեղացիների հիմնական մասն ապրում է արտագնա աշխատանքների հաշվին:

Եվ այս լուրջ խնդիրների առկայության պարագայում հօդս է ցնդում Ջավախքում դրական տեղաշարժերի իմիտացիան, որը ստեղծվել է շրջանը գազիֆիկացնելուց եւ ճանապարհները վերականգնելուց հետո: