Երկիրը դարձել է երեք նախագահների կռվախնձոր

«Ներքաղաքական զարգացումներով պարտադրված»` Հայաստանի Մարքսիստական կուսակցության ղեկավար Դավիթ Հակոբյանը կոչ ուղղեց ազգին. «Երկիրը դարձել է երեք նախագահների կռվախնձոր: Իրենց  ընդդիմադիր հայտարարած քաղաքական սուբյեկտները գործում են ազգային շահին անհարիր»:

Անդրադառնալով հայաստանյան ընդդիմադիր ուժերից յուրաքանչյուրին` Դավիթ Հակոբյանը Դաշնակցության մասին ասաց, որ  առաջնորդվում են «առաջ մորթիդ, հետո որդիդ» գաղափարախոսությամբ:

«Րաֆֆի Հովհաննիսյանի ճամբարը կրիայի նման իր տաշտակից գլուխը չի հանում եւ թաղված է անորոշության ու անհայտության գրկում»,- բնութագրելով «Ժառանգությանը» ասաց Հայաստանի գլխավոր մարքսիստը:

Իսկ ՀԱԿ-ը, նրա համոզմամբ, վերափոխված ՀՀՇ-ն է, որը քաղաքական գործընթացների արդյունքում դարձել է հանրապետականի աղախինը:

«Ելնելով պատմական եւ քաղաքական անհրաժեշտությունից, ազդարարում ենք «Ազգային ճակատ» նոր ալյանսի ձեւավորման մասին, որը ենթադրում է կուսակցականների եւ անկուսակցականների դաշինք»,- ազդարարեց Դավիթ Հակոբյանը` այդպես էլ չնշելով, թե դաշինքն արդեն անդամներ ունի՞, թե՞ ոչ:

«Հայեր, միաբանվե'ք»,- կոչ արեց  մարքսիստը` խոստանալով նոր դաշինքի վերաբերյալ տեղեկություններ հաղորդել մեկ ամսից:

Դավիթ Հակոբյանը համոզված է, որ սեպտեմբերին արտահերթ ընտրություններ են լինելու, իսկ նոր դաշինքի ձեւավորումը կավարտվի հենց սեպտեմբերին: