ՏՏ ոլորտի հարցերի քննարկում՝ նախագահի մոտ

Արցախի նախագահ Բակո Սահակյանի մոտ շաբաթ օրը տեղի է ունեցել աշխատանքային խորհրդակցություն` նվիրված հանրապետությունում տեղեկատվական եւ հեռահաղորդակցության տեխնոլոգիաների զարգացման հարցերին:

Ինչպես հայտնում են նախագահի աշխատակազմի տեղեկատվության գլխավոր վարչությունից, առանձնահատուկ ուշադրություն է դարձվել Արցախում տեղեկատվական տեխնոլոգիաների կենտրոնի հիմնադրման հարցին:

Բակո Սահակյանի խոսքերով` ոլորտի զարգացումն ունի ե'ւ քաղաքական, ե'ւ տնտեսական նշանակություն: Ոլորտի զարգացման համար, ըստ նախագահի, անհրաժեշտ է սերտ համագործակցություն հաստատել Հայաստանի եւ Սփյուռքի համապատասխան օղակների հետ:

Այս կապակցությամբ Բակո Սահակյանը բարձր է գնահատել ՀՀ էկոնոմիկայի նախարարության, Ձեռնարկությունների ինկուբատոր հիմնադրամի, ՀՀ ՏՏ ձեռնարկությունների միության եւ մի շարք այլ կազմակերպությունների ջանքերը, որոնց ներկայացուցիչները ներկա էին խորհրդակցությանը: