Ոչ թե պատմական սխալ, այլ զոհերի հիշատակի անարգանք

ԱՄՆ Իլինոյս նահանգից ընտրված կոնգրեսական Ռոբերտ Դոլդը եւ Կալիֆոռնիա նահանգից ընտրված կոնգրեսական Ջիմ Կոստան կոչ են արել ԱՄՆ պետքարտուղար Հիլարի Քլինթոնին` Հայոց ցեղասպանությունը ներառել պետդեպարտամենտի կայքում զետեղված` Հայաստանի եւ Թուրքիայի պատմության մեջ. տեղեկացնում է ՀՅԴ Ամերիկայի Հայ Դատի հանձնախումբը:

Ապրիլի 15-ին գրված նամակում կոնգրեսականները նշում են, որ անգամ ԱՄՆ նախագահ Օբաման է իր ապրիլքսանչորսյան ուղերձում, թեեւ չօգտագործելով «ցեղասպանություն» բառը, ասել, որ 1915-ին 1,5 միլիոն հայ է կոտորվել Օսմանյան կայսրությունում:

Ըստ նրանց` հայ եւ թուրք ժողովուրդների ընդհանուր պատմության այդ ողբերգական էջի բացթողումը ոչ միայն պատմական սխալ է, այլեւ Ցեղասպանության անմեղ զոհերի հիշատակի անարգում:

Կոնգրեսականները նաեւ կոչ են արել Քլինթոնին` միանալ Օբամային եւ ապրիլի 24-ին արտասանել «ցեղասպանություն» բառը: Նրան համարում են, որ այդպիսով Օբաման կկատարի իր նախընտրական խոստումը. «Հայոց ցեղասպանությունը հայտարարություն, անձնական կարծիք կամ տեսակետ չէ, այլ անհերքելի պատմական փաստ: Որպես սենատոր` ես քաջալերում են Հայոց ցեղասպանության բանաձեւի ճանաչումը, որպես նախագահ` ես կճանաչեմ այն»:

Հայ Դատի հանձնախմբի գործադիր տնօրեն Արամ Համբարյանը ամբողջ հայկական համայնքի անունից շնորհակալություն է հայտնել կոնգրեսականներին իրենց նախաձեռնության համար: