Պարոն Գբագբոն պետք է անհապաղ հեռանա.ՄԱԿ

ՄԱԿ-ի գլխավոր քարտուղար Պան Գի Մունը հաստատել է, որ «երկնագույն սաղավարտներին» հրաման է տվել ուժ գործադրել Քոթ դ'Իվուարի` դեկտմբերի ընտրություններում պարտված նախագահ Լորան Գբագբոյի դեմ:

Նրա խոսքերով` ՄԱԿ-ի եւ Ֆրանսիայի ռազմական ուղղաթիռները ռմբակոծել են Գբագբոյի կեցավայրը` «Աբիջանի խաղաղ բնակչությանը եւ մեր խաղաղարարներին սպառնացող ծանր սպառազենը ոչնչացնելու համար»:

Գլխավոր քարտուղարը հայտարարել է, որ այդ մասին տեղյակ է պահել ՄԱԿ-ի Անվտանգության խորհրդին:

«Ինձ հատկապես անհանգստացնում են երկրի հումանիտար իրադրությունը եւ մարդու իրավունքների խախտումները: Այդ բռնությունից տուժում են քաղաքացիական անձինք, մարտերը պետք է դադարեցվեն: Պարոն Գբագբոն պետք է անհապաղ հեռանա»,- ասել է Պան Գի Մունը:

Հիշեցնենք, որ Աբիջանում նորընտիր նախագահ Ալասան Ուատտարի ուժերը ՄԱԿ-ի եւ ֆրանսիական զինուժի օգնությամբ նախկին նախագահ Գբագբոյին  զինաթափելու անհաջող փորձեր են անում: