Panasonic-ի նոր ֆոտոխցիկը "շպարում" է

Panasonic-ը նոր լուսանկարչական ապարատ է արտադրել, որը համալրված է «Գեղեցկության շտկում» սարքով: Այն սպիտակեցնում է նկարում պատկերված մարդու ատամները, հարթեցնում մաշկն ու ծածկում կնճիռները:

Ինչպես գրում է «Թելեգրաֆը», Panasonic Lumix DMC-FP7 մոդելի «Դեմքի վերականգնման» գործիքն էլ հնարավորություն է տալիս ընտրել նկարի գույներն ու երանգները, դեմքի թխության աստիճանն ու նույնիսկ շրթներկ ավելացնել:

Աչքերի ստվերափոշու գույնի ընտրությունը տատանվում է նուրբ երանգներից մինչեւ ցնցող վարդագույնը: Սա հիանալի միջոց է հատկապես այն դեպքում, երբ նկարում ուրվականի պես սպիտակ ես երեւում:

Ի դեպ, ֆոտոխցիկն օգտագործողներ արդեն եղել են: Լուսանկարում պատկերված մարդիկ «շպարվելուց» հետո 10 տարով երիտասարդացել են:

Ֆոտոխցիկը ունի 16 մեգապիքսել խտություն, 3.5” մակերեսով սենսորային դիսփլեյ: